Хаарбах дьиэттэн дьону көһөрүү Өрөспүүбүлүкэ сүрүн соруга буолар

Өрөспүүбүлүкэҕэ хаарбах дьиэттэн олохтоохтору көһөрүү бырагырааммата тэтимнээхтик барар. Федеральнай уонна өрөспүүбүлүкэтээҕи бырагыраамманан хаарбаҕынан билиниллибит дьиэлэр олохтоохторун  уочарат быьыытынан көһөрөллөр. Саха Сиригэр 2019 сылтан саҕалаан тустаах бырагыраамманан 500 тахса тыһыынча кв.м. эргэ дьиэни көтүрдүлэр, 30 тыһыынчаттан тасха киһи саҥа дьиэлэннэ. 2025 сылга диэри өссө 620 кв.м. дьиэни көтүрүөхтээхтэр. Бу 2017 сылга диэри хаарбаҕынан бигэргэммит дьиэлэр.

"3600 тахса элбэх кыбартыыралаах дьиэ киирбитэ. Уопсай иэнэ 1 млн. 153 тыһ. кв. миэтирэ.  61 тыһ. тахса киһи олорор. Онтон бүгүҥҥү күннээххэ, биһиги 533 тыһ. кв. миэтирэн номнуо көһөрдүбүт. Ол эбэтэр, 33 тыһ. тахса киһини. Уопсай үбүлээһинэ 119 млрд, онтон 60 млрд. тутуннубут.  Барыта тутууга уонна дьоҥҥо толуйууну төлүүргэ барда", - диэн СӨ олорор дьиэлэри тутууга дирекциятын, программалары олоххо киллэрии салаатын начальнига Игорь Алексеев иһитиннэрдэ.

Өрөспүүбүлүкэ эргэ дьиэлэрин баһылыыр үксэ киин куоракка баар. Онон Дьокуускай куорат хаарбах дьиэлэрин көтүрүү киин болҕомтоҕо турар. Маныаха көтүрүү, көһөрүү уонна сана дьиэлэри тутуу араас бырагырааммаларынан ыытыллар.  Быйыл 17 кыбаарталтан 16 хаарбах дьиэттэн олохтоохтору көһөрдүлэр. Хаарбах дьиэ олохтоохторо "Звезднай" саҥа кыбаарталга уонна Свердлова аатынан уулуссаҕа күлүүстэри туппуттара. Аны сэтинньи ыйга Кузьмин аатынан уулуссаҕа элбэх кыбартыыралаах саҥа дьиэ үлэҕэ киирдэҕинэ, онно көһүөхтэрэ. Оттон уопсайа куорат үрдүнэн 1188 хаарбах дьиэ баар. 

"Билиҥҥи туругунан Дьокуускай куоракка 1188 хаарбах туруктаах дьиэ баар. Онтон 162 дьиэ региональнай бырагырааммаҕа киирэн турар, 79 дьиэни көһөрөрбүт хаалла. Сыл бүтүөр диэри 200 тахса ыал саҥа дьиэҕэ көһүөхтээх. Спортивнай оройуоҥҥа 154 дьиэ киирэн турар, 68 дьиэ атын бырагыраамманан барыахтаах. Сайсаарга 63 дьиэ комплекснай сайдыынан,  "Озеро" бырайыагынан тутуллуохтаах. Бу  86, 93, 94 кыбаарталлар. Маны барытын суоттаан туран, 721 дьиэ хомойуох иһин, билигин туох да үбүлээһинэ суох", - диир Дьокуускай куорат дьаһалтатын дьиэ-уот сыһыаннаһыытыгар департаменын дириэктэрин солбуйааччы Вадим Семёнов.

Туруоруллубут соругунан, 2030 сылга диэри киин куорат үрдүнэн биир да хаарбах туруктаах дьиэ хаалыа суохтаах. Ол эрэн билиҥҥи туругунан, үгүс дьиэни көһөрөргө үп-харчы тиийбэт. Онон бу күннэргэ, Владивостокка ыытылла турар Илиҥҥи экономическэй пуорумҥа Өрөспүүбүлүкэ уонна Дьокуускай куорат салалтата хаарбах дьиэттэн көһөрүү үбүлээһинигэр кэпсэтиини ыытыахтаах. Оччоҕо кэлэр бырагыраамманы күүппэккэ, баар бырагыраамма иһинэн тутууну тэтимирдэр кыахтаныахтара.

"Дьокуускай куоракка 721 дьиэни көһөрөргө күүһү-көмөнү билигин ыыталларыгар үлэлэһэбит. 2025 сылы күүппэккэ дьүөрэлии көмө көрдүүбүт. Ол күүс-көмө ыыттахтарына, төһө да улуустарбыт бу билиҥҥи бырагыраамманы бүтэрэ иликтэрин иһин, биһиги аныгыскыны саҕалыа этибит", - диэн салҕыы Дьокуускай куорат дьаһалтатын дьиэ-уот сыһыаннаһыытыгар департаменын дириэктэрин солбуйааччы Вадим Семёнов эттэ.

Маны таһынан, инникитин 17 кыбаартал сөргүтүллэн саҥа Спортивнай микрорайонна кубулуйуохтаах. Манна саҥа оскуола, оҕо уһуйаана, спортзал тутуллан үлэҕэ киириэхтээх. Спортивнай микрооройону тутарга 90 тыһыынча квдратнай миэтэрэ эргэ дьиэни көтүрэн, ол миэстэтигэр 46 олорор дьиэ тутуллуоҕа. Экономическай пуорум кэмигэр  үбүлээһини ыытыыга сөбүлэҥи түһэристилэр. Онон бу бырайыак эргэ дьиэлэри аҕыйатыыга олук буолуоҕа.