Хаһаайыстыбалар окко киирдилэр

Бөтүөрүөп кэннэ ходуһаларга отчут үксээтэ. Быйыл халлаан туран биэрэн сорох улуустар эрдэ таҕысталар.  Кэмигэр ардаабыт буолан үүнүү үчүгэйинэн сыаналанар. Оттон курааннаабыт сирдэргэ былыт ытыытыгар тыа хаһаайыстыбатын министиэристибэтэ гражданскай оборуона министиэристибэтин кытта үлэлэһэр. Сүрүннээн киин уонна илин эҥээр оройуоннар бастакы кэбиһиилэри туруордулар.

Вячеслав Гаврильев, СӨ ТХМ үүнээйи, сир үлэтин салааларын уонна мелиорацияны сайыннарыыга департаменын салайааччы: "Бүгүҥҥү күҥҥэ отчуттар номнуо 884 туоннаны туруордулар. Сүрүннээн киин улуустарга оттоон саҕалаатылар. Саммай элбэҕи, 400 туоннаттан тахсаны, хаҥалас улууһугар оттоотулар". 

Нам улууһа ходуһаҕа эмиэ тахсыбыта быданнаата. Манна быйыл от былаана 29 тыһыынча туонна. Намнар үксүн арыы сиргэ оттуур буоланнар. Отчуттары баржанан көһөрүү, от хампаанньатын биир тутаах түһүмэҕэ. Билигин хаһаайыстыбалаахтары ходуһаҕа туоратыы барар.

Владимир Макаров, Нам улууһун тыа хаһаайыстыбатын салалтатын салайааччы: "Биһиэхэ 74,5 туонна от оттонно, 177 гектар охсулунна. Оттон уматын чааһыгар, улууска баар икки заправканы кытта үлэлэһэбит. Дуогабардаспыппыт, уматык картатын ыллыбыт эрэ отчуттарга түҥэтэн саҕалыахпыт".

Ити курдук быйылгы от уратылаахтык ааһыаҕа. Ол курдук уматыгы испииһэк быһыытынан иһиккэ куттаран атыылаһыахтара. Маныаха хас биирдии отчукка наадалаах кээмэй  тиийэригэр өрөспүүбүлүкэ салалтата саҥа бэрээдэги олохтоото. Күн бүгүн 20 улууска 844 туонна тыырыллынна. Оттон  от кэмигэр Саха сиригэр туһаныллар уматык  4200 туоннаҕа тэҥэнэһэр.  Хаалбыт кээмэйи салгыы толорор туһунан суһал ыстаап мунньаҕар иһитиннэрдилэр.

Артем Александров, СӨ Тыа хаһаайыстыбатын миниистирэ: "Оройуонтан оройуоҥҥа көһөрөн атыылаабыттарын гына уматык хампаанньаларыгар хааччах киирдэ. Баар балаһыанньаны өйдөөн туран, от, хомуур кэмигэр бэриллибит кээмэйи уонна улуус саппааһын сөпкө туһаныахпытын наада".

Быйыл сайын өрөспүүбүлүкэҕэ 423 тыһыынча туоннаттан тахса оту оттуур сорук турар. Маны таһынан 30 тыһыынча туонна сиилэс, 15 тыһыынча туонна кэриҥэ сенаж бэлэмнэниэҕэ. Урукку дьылларга курдук былааннаах кээмэйи барытын өрспүүбүлүкэ иһигэр бэлэмнэниэ.