Тыйаатыр айар дьылын саҥа туруоруунан түмүктээтэ

Бу өрөбүллэргэ бары күүппүт сахалыы испиктээкил бастакы туруоруута буолан ааста. "Түүл уҥуор кытыла"  Былатыан Ойуунускай аатынан Саха тыйаатыр премьернай испиктээкилэ буолар. Бу туруоруу биллиилээх суруйааччы Николай Лугинов "Самородки из преисподней" диэн сэһэнигэр олоҕуран режиссёр Андрей Борисов туруорда.

Эдуард Захаров, П. А. Ойуунускай аатынан Саха тыйаатырын артыыһа: "Сүрдээх долгутуулаах күн үүннэ. Бу туруорууга үлэлээбиппит быданнаата, икки аҥаар ый буолла. Мин испиктээкилгэ икки оруолу толоробун".

Айымньы эдэр киьи баайга-дуолга, улахан куорат уоттарыгар тардыһыытын, олох кырдьыга түүл уонна илэ киирбитигэр хайдах уларыйарын туһунан кэпсиир. Биир сүрүн оруолу Василий Романов оонньуур.

Василий Романов, П. А. Ойуунускай аатынан Саха тыйаатырын артыыһа: "Мин оруолум У Синь диэн ааттаах. Кини аҥаара кытай, аҥаара хунну. Испиктээкил саҕаланыытыгар кырдьаҕас оҥочоһут диэн баар, бу кини түүлэ. Бу туоруоруу барыта түүл тула оҥоһуллар".

Кыраныыссаттан кэлбит  У Синь, үчүгэй олоххо тардыһан өрүс сырыытыгар үлэҕэ киирэр. Биир сүрүҥ испиктээкил тиэмэтэ- "Түргэнник уонна чэпчикитик хайдах байыахха сөбүй?" диэн билиҥҥи аан дойдуга уустук туруга уонна киһи ис өйүн санаатын кытта охсуһуута буолар. Билиҥҥи аныгы олох кыһалҕатын көрдөрөр.

«Көрөр саала толору. Бу туоруоруу айар дьыл биир саамай чаҕылхай испиктээкилэ буолла. Бэлэмнэнии ыам ыйыттан саҕаламмыта, таҥас-сап, уот-күөс дьон болҕомтотун олус диэн тардар», - Айталина Чупрова, корреспондент.

Көрөөччүлэр бэйэлэригэр биллэр, тапталлаах кинигэлэрин ис хоһоонугар умсугуйан киирэллэр. Николай Лугинов санаалара сыанаҕа тиллэн, көрөөччү сыанаттан хараҕын сатаан араарбат.

Испиктээкил саҕаланыаҕыттан, дириҥ ис хоһоонноох интириэһинэй туруоруу буоларын билэллэрэ.

Юлия Дмитриева, Аграфена Андросова, испиктээкил көрөөччүлэрэ: "Туруоруун көрө элбэх буолан кэллибит. Кини испиктээкилэ итинник буолааччы, киһини толкуйдатар, философскай көрүүлээх".

Саха тыйатыыр бэйэтин 120-с тыйаатыр сезонун "Түүл уҥуор кытыла" диэн саҥа испиктээкил бастакы туруоруутун ситиһиилээхтик түмүктээтэ. Бу сэһэни ис хоһоонунан уонна артыыстар айар кыахтарын саҥа өттүттэн арыйда.