Дьокуускайга туризм уонна креативнай индустрия бэстибээлэ ыытылынна

Дьокуускай бэлиэ сирдэринэн экскурсия. Киин куорат историятын, чахчыларын билиэн баҕалаахтар оптуобуска киирэн олоруналлар. Бу саҥа сүүрээн буолан дьон үгүс.

Александра Фёдорова, экскурсовод: «Биһи экскурсиябыт болуоссаттарынан ааһыахтара. Доҕордоһуу, Ленин, Орджоникидзе уонна Кыайыы болуоссата. Остуоруйатын туһунан, хайдах саҕаламмытын уонна билигин хайдах олорорбутун кэпсиибит».

Шергин шахтатын, Учуутал искибиэрин, Эр дьон гимназияьтын курдук чаҕылхай чахчылар экскурсия кэмигэр кэпсэнэллэр. Бу маннык үтүө тэрээһин туризм уонна креативнай индустрия бэстибээлин чэрчитинэн ыытыллар. Саха сиригэр бу хайысха  сайдыытыгар кэнники сылларга болҕомто улаатар. Бу түмүгэ сыллата өрспүүбүлүкэ таһыттан сынньанааччы ахсаана үксүүр. Ол курдук ааспыт сылга 300 тыһыынчаттан тахса турист Саха сиригэр кэлэн барбыт. Бу туһунан уонна хайысханы сайыннарыы тосхоллорун бэстибээлгэ дьүүллэстилэр.

Ильма Себастьянова, Туризм сайдыытын агентствотын туризмы сайыннарыы салаатын салайааччы: «Уопсайа 50-тан кыттааччы баар. Ол иһинэн улуустар бааллар, туроператордар. Барыларын кытта билсэн, түмсэн, бары биир хайысхаҕа үлэлээммит, Сахабыт сирин туризмын сайыннарыы диэн буолар».

Оттон ис түризм кэнники 5 сылга 3 төгүл улааппыт. Маныаха Сахабыт сирин киэҥ сирин-уотун, кэрэ айылҕатын дьоҥҥо-сэргэҕэ тарҕатыыга улуустар ылсаллар, итини сэргэ сыыньалаҥы тэрийэр туроператордар элбииллэр. Үтүө холобур Бүлүү улууһа. Манна 400 кв.м. иэннээх Махатта диэн кумах куйаар билигин киэҥ араҥаҕа аһаҕас, сылдьааччы ахсаана сыллата үксүүр. 

Василий Мандаров, "Махатта Тукулаан" туроператора: «Биһиги туроператор быһыытынан бэстибээлгэ кытта сылдьабыт. Биһиги сайын тукулааннарбытыгар дьону сынньатабыт. Сүрүн өттүбүт балыктааһын буолар».

Бэстибээлгэ ити курдук хас биирдии кыттааччы тэрийэр сынньалаҥын билиһиннэрдэ. Саха сирин сүрүн брендэ Өлүөнэ туруук хайалара. Манна сыллата 50 тыһыынча кэриҥэ киһи сылдьар. Онон сынньалаҥ усулуобуйатын тупсарыы, тириэрдии көрүҥүн хаҥатыы сүрүн сорук.

Дмитрий Громов, Өлүөнэтээҕи холбоһуктаах өрүс пароходствотын  туризмҥа уонна дьону таһыы салаатын салайааччы: «Бэс ыйыгар биһиги Иркутскай уобаласка үлэлиир буолабыт. Оттон өлүөнэ очуостарыгар быйыл үс хайысханнан дьоннору тириэрдэр буолабыт».

Өлүөнэни туоруур муоста тутулуннаҕына туризм өссө күүскэ сайдарын, онуоха бэлэм буолуохтаахпытын ыйдылар. Итиэннэ улуустарга бу хайысханы сайыннарыыга бу тэрээһини күүстээх олук буолуо диэн түмүктээтилэр.