Киин куорат Лермонтова 68 нүөмэрдээх дьиэтин олохтоохторо айманаллар

Тустаах дьиэ мас тутуу, икки мэндиэмэннээх, 1965 сыллаахха тутуллан киирбит, 16 кыбартыыра баар. Дьиэ олохтоохторо 9 сыл устата саҥа дьиэҕэ көһөрөрү туруорсаллар. Өссө 2009 сыллаахха бу дьиэни олорорго табыгаһа суох диэн быһаарбыттара. Ол эрэн, бу оройуоҥҥа тутааччы хампаанньа хас да сири ылан, улахан таас дьиэлэри тутан саҕалаабыт уонна онно көһөрөр туһунан олохтоохтору кытта дуогабар баттаспыт. Күн бүгүҥҥэ диэри бу кыһалҕа быһаарыллыбакка турар.

“Тутааччы Стройкон тэрилтэ чуп-чугас дьиэ тута турар. Биһиги санаабытыгар, олох сыыһа. Кинилэр докумуоннарын хайдах оҥорбуттарын туһунан мэрияҕа уонна прокуратураҕа сайабылыанньа суруйар санаалаахпыт. Кыраан үлэлии турар эмиэ чугас, дьиэҕэ мэһэйи үөскэтэр”, - диэн Норуот фронун саха сиринээҕи салаатын бэрэссэдээтэлин солбуйааччы Алексей Лаптев иһитиннэрдэ.

Оттон  билигин мас дьиэ аттыгар кэккэлии чугас саҥа дьиэ тутуута ыытыллар. Бу тутуу үлэтэ дьиэттэн быһа холоон, 5 эрэ миэтирэ арыттаах бара турар. Араас хаһар үлэлэр ыытылланнар мас дьиэ хамсаабыт уонна сууллуон сөп диэн олохтоохтор куттаналлар. Билигин судаарыстыба өттүттэн эппиэти күүтэллэр.