Анал байыаннай дьайыы кыттыылаахтарыгар көмө тиһигин быспакка оҥоһуллар

Анал байыаннай дьайыы кыттылаахтарыгар көмө үлэтэ күн ахсын ыытыллар. ХИФУ устудьуоннара билиҥҥи туругунан хаххалыыр сиэккэ өрөллөр уонна гуманитарнай көмө хомуйаллар. Ону таһынан анал байыаннай дьайыы кыттыылааҕа үөрэнэ киирбит буоллаҕына үрдэтиллибит стипендия ананар. Бу барыта "Улуу Үһүйээн" диэн уопсастыбыннай хамсааһын кыттыылаахтара тэрийэллэр. Оннук курдук алтынньы ый бүтэһик күннэригэр саҥа көмө баартыйата эмиэ ыытыллыахтаах.

Арылхан Сыроватскай, М.К. Аммосов аатынан ХИФУ устудьуоннарын профсоюзтарын бэрэссэдээтэлин солбуйааччы: «Гуманитарнай көмө ыытабыт, уопсайа 40 туонна буолла. Уонна бу сиэккэ хомуйан ыытабыт. ХИФУ устудьуоннаргыар матырыйаалынай көмө оҥоробут, бэйэтэ кыттыылаах эбэтэр дьиэ кэргэнэ буоллаҕына».

Тымныылар кэлбиттэринэн сибээстээн Дьокуускайдааҕы педагогическай колледж үлэһиттэрэ анал байыаннай дьайыы кыттыылахтарыгар анаан сылаас суорҕан атылаһан ыыталлар, ону таһынан халыҥ наскы тигэллэр. Биир санаанан салайтаран түмсэллэр уонна байыастарга анаан тохтоло суох үлэлииллэр.

Билиҥҥи кэмҥэ суунар - тараанар тэрили, үлэҕэ наадалаах бэрчээккэлэри, фонариктары, батарейкалары уонна таҥас арааһын ыыталлар. Үс сыл үлэһиттэр профсоюзтарын бэрэссэдээтэлинэн үлэлиир Айаана Тоскина этэринэн көмөлөһүөн баҕалаах киһи элбэх, үксэ устудьуоннар, колледж үлэһиттэрэ кэлэннэр хаххалыыр сиэккэ баайсаллар уонна гуманитарнай көмө туттаралар.

Айаана Тоскина, С.Ф. Гоголев аатынан Дьокуускайдааҕы педагогическай колледж үлэһиттэрин профсойууһун бэрэссэдээтэлэ: «Сорох үлэһиттэр дьиэлэригэр баайан аҕалаллар, өрөбүллэригэр игин. Манна эбиэт кэмигэр баайааччыбыт».

Уопсай дьыалаҕа үөрэх салаалара бары сэргээн кытталар. Оскуола оҕолоро саллаакка сурук суруйаннар ыыталлар, уопсастыбыннай хамсааһыннар таҥас-сап тигэллэр, гуманитарнай көмөнү хомуйаллар, ону таһынан волонтердар харысхал оҥороллор.