Саха сирэ оҕо төрөөһүнүн көрдөрүүтүнэн Арассыыйа регионнарыгар инники күөҥҥэ

Хатас нэһилиэгиттэн сылдьар Изабелла Ковбаса аҕыйах хонуктааҕыта этэҥҥэ оҕолон сүргэтэ көтөҕүллэ сылдьар. Аны номнуо балыыһаттан тахсарга бэлэмнэнэр. Ийэ саҥа төрөөбүт уолчаанын бэйэтин үүтүнэн аһатан саҕалаата. Икки миэстэлээх хоско ирдэбилгэ эппиэттир бары услуобуйа баар. Быраастар бэрт болҕомтолоохтук сыһыанаһаллара наһаа үчүгэй диэн эдэр ийэ санаатын үллэстэр.

Изабелла Ковбаса, эдэр ийэ: «Астара үчүгэй. Быраастар көмөһөллөр».

Дьокуускайдааҕы Перинатальнай Кииҥҥэ Саха сирин бары улуустарыттан сүрүннээн болдьох иннинэ төрүөхтээх, эрдэ эппэрээссийэлэммит ийэлэр киирэн оҕолоноллор. Билигин Кииҥҥэ 50-тан тахса саҥа төрөөбүт дьахтар баар, послеродовай салаа уопсайа 85 миэстэлээх. Ааспыт сылга манна биэс аҥар тыһыынчаттан тахса оҕо төрөөбүтэ, бу сыл үүнүөҕүттэн номнуо үс аҥар тыһыынчаттан тахса кырачан күн сирин көрдө. 

Анна Яроскумова, Перинатальнай киин төрүүр салаатын сэбиэдиссэйэ: «1771 уол төрөөбүтэ уонна 1752 кыыс төрөөтө. Күн аайы 20 игин киһи төрүүр».

Хат дьахталлар ортолоругар бүгүҥҥү күҥҥэ үрдүк дабылыанньа уонна сахарнай диабет курдук ыарыы элбэхтик бэлиэтэнэр диэн быраастар бэлиэтииллэр. Маныаха кииҥҥэ тустаах патология салаатыгар ыарыылаахтары көрөн-истэн, эмтээн төрүүргэ бэлэмнииллэр. Оҕо туруга биллэн туран ийэтин доруобуйатыттан быһаччы тутулуктаах. Маныаха оҕо төрөөтүн кытта тустаах чинчийиини ааһан ыарыыны эрдэттэн сэрэтиигэ болҕомто уураллар.

Елизавета Назарова, Перинатальнай киин неонатолог бырааһа: «Сүрүн көмөбүт – саҥа оҕо төрөөбүтүн кэннэ бастакы уочарат оҕо ийэ үүтүн иһэригэр көмөлөһөбүт уонна бэрэбиэркэ ааһаллар. Онно ыарыыларга, анаалыс, вакцианация ааһаллар».

Саха сирэ нэһилиэнньэ эбиллиитинэн, оҕо төрөөһүнүн көрдөрүүтүнэн Арассыыйа регионнарыгар инники күөҥҥэ сылдьар. Демографическай балаһыанньаны тупсарыыга дьиэ кэргэҥҥэ көмө миэрэлэр ахсааннара сыллата эбиллэр, ийэ хапытаала, "Үйэ оҕолоро" төлөбүр, үһүс оҕоҕо сир учаастага, 25 саастарыгар диэри ыал буобуттарга харчынан көмө, биир кэлим босуобуйа буолаллар. Биллэн турар бу барыта ыал оҕолонуутугар төһүү буолар.