Өрөспүүбүлүкэҕэ хомуур үлэтэ салҕанар

Хара сарсыардаттан бэрчээккэ кэтэн, куулга силистиээх оҕуруот аһа хомуллар. Биир киһи күҥҥэ 40 куулу толорор, нэдилэ иһигэр үлэни түмүктүүр сорук турар.

Николай Аммосов 6 гектардаах сириттэн 50 туоннаттан тахса хортуоска хостонуохтаах. 15 сылтан тахса үүнээйини олордуунан дьарыктанар дириҥ уопуттаах киһи, өлгөм үүнүү кистэлэҥин үллэстэр. Кини хортуоппуйга 3 күн буола-буола  уу куттахха, уоҕурдуу да наадата суох үчүгэйдик үүнэр диэн этэр.

Николай Аммосов, бааһынай хаһаайыстыба баһылыга: «Быйыл үүнүү үчүгэй. Кэлин ардахтаата. Бэйэн да уопутуран иһэҕин. Саҥа саҕалаатым».

Дьокуускай үрдүнэн 31 хаһаайыстыба хортуоппуйу үүннэрэр. Билиҥҥи кэм туругунан уопсай сыллааҕы былаантан 30 быраһыана хостонно. Былырыыҥҥы сыллааҕы көрдөрүүнү кытта тэҥнээтэххэ, үүнүү этэҥҥэ, хостооһуҥҥа бары хаһаайыстыба таҕыста.

Хортуоппуйга быйыл быйаҥ дьыл эбит буоллаҕына, атын силистээх оҕуруот аһыгар көрдөрүү намыһах. Ол эбэтэр моркуоп, сүбүөкүлэ үүнүүтэ былаантан хаалан иһэр. Манна эбии хаппыыста уонна аһаҕас сиргэ үүнэр оҕуруот астарын үүнүүтэ эмиэ мөлтөх туруктаахтар. Ол төрүөтүнэн, сайын саҕаланыыта кураан уонна түүнүн тымныы күн-дьыл туран үүнүү бытаарда диэн агрономнар этэллэр.

Марианна Пермякова, Дьокуускай куорат сүрүн агронома: «Бэс ыйыгар сөҥүү улаханнык түспэтэҕэ, сорох сиринэн кураан буолбута. Уу кутуулаах буолан сөптөөх урожай ылыахпыт дии саныыбын».

Туймаада хочотун соҕуруу өттүгэр быйаҥ дьыл буолбут буоллаҕына, хоту өттө курааннаата. Ол эрэн, хаһаайыстыба барыта уу кутуллар ситимнээх буолан, сыллааҕы былаан ситиһиллэр чинчилээх. Күн бүгүн Хатаһынан, Маҕанынан, Тулагы-Киллэминэн хаһаайыстыбалар хортуоска хостооһуҥҥа маассабайдык таҕыстылар. Бу сылга 554 гектар сиргэ ыһыллыбыт хоруоппуй үс гыммыт биирэ куулланна. Быйыл тоҥоруу эрдэ кэлэрэ күүтүллэр, онон балаҕан ыйын ортотугар диэри хортуоска хостооһунун бүтэрэр сорук турар. Салгыы хаппыыста быһыллара хаалар.