Дьокуускай куораппыт 394 сылын көрүстэ

Суудар госудаар дьаам сыдьаана Дьокуускай куорат аҕа баһылыгар историяны кэрэһэлиир ыытыыны туттарар. 3  үйэ историялаах дьаамсыктар биэрэстэ остуолбалара дьэ оннун булар.

Дьоллоох Дьокуускай куораппыт 394 сылын бэлиэтээтэ. Бу бэлиэ түгэн чэрчитинэн киин куорат уокуруктарыгар нэдиэлэ устата араас тэрээһиннэр ыытылынныллар. Бырааһынньыгы Табаҕалар арыйдылар. Бу кэмтэн ыла тустаах нэһилиэккэ "25 биэрэстэ. Дьаамнар уһаайбалара" диэн ааттаах историческай-этногорфическай киин арыллыытыгар үлэ барыаҕа.

Дмитрий Садовников, Дьокуускай куорат уокуругун баһылыга: «Манна этнокомплекс арыйыахпытын баҕарабыт, дьиҥнээх былыргы хаалбыт дьиэлэртэн тутаммыт, дьаамсыктар историяларын, хайдах олорбуттарын көрдөрөр».

Бу кун Табаҕа олохтоохторо, араас ыстаансыйалартан дьаамсыктар сыдьааннара кэлэн үөрэн-көтөн, ыллаан-туойан бардылар. Өр сыл кэтэспит ыра санаалара олоххо киирэриттэн үөрүүлэрэ баһаам.

Анатолий Соколов, Елаанка ыстаансыйа дьаамын сыдьаана: «Төрдүлэрим бары дьамсыыктар. Мин кыра эрдэхпинэ дьамсыык дьыалатын эрдэттэн билэн, ону-маны истэн».

Онтон бу Тулагы-Киллэм ытык сирэ. Манна эмиэ историяны кэрэһэлиир киин арыллынна. Үөрүүлээх быһыыга-майгыга арыллыы сиэрэ-туома ыытылынна. Таһырдьаттан саҕалаан кэлбит дьон урукку үйэлэргэ баар буолбут курдук сананаллар.

Бурдук тардар, талкы, иһит-хомуос онтон да атын ааспыт үйэ кэрэһиттэрэ дьон сэҥээриитин ылыахтара диэн тэрийээччилэр кэпсииллэр. Хас биирдии экспонат бэйэтэ туспа суоллаах-иистээх, историялаах. 

Пётр Попов, "Тулагы-Киллэм" МТ баһылыга: «Көрдөрөрбүт элбэх, араас култууралаах омуктар олоро сылдьыбыттара, Гражданскай сэрии событиялара буолбуттара».

Бу икки историяны кэрэһэлиир кииннэр Табаҕаҕа уонна Тулагыга Дьокуускай куорат 400 сылыгар диэри силигин ситэн, толору тыынынан үлэлиир соруктаах.