Нам улууһугар аймах түмсүү билиһиннэрэр сыаллаах-соруктаах тэрээһини ыытта

Биир уруу. Биир хаан. Биир ситим - диэн бэргэн тыллардаах төрүччү түмсүү 3 күннээх аһаҕас халлаан анныгар тэрээһинэ  саҕаланар. Быйыл иккис төгүлүн ааһар тэрээһин 100-тэн тахса киһини түмтэ. Онтон 40 оҕону. Бу ураты бырайыагы Нам улууһун Слепцовтар халыҥ аймахтара ыытан саҕалаата.

Валентин Васильев, Нам улууһун олохтооҕо: «Сыалбыт-сорукпут оҕолор билиҥҥи кэмҥэ гаджеттарга олороннор бэйэ-бэйэлэрин кытта билсибэттэр. Куораттар бааллар элбэх баҕайы, улуустан Намтан бааллар, араас нэһилиэктэртэн бааллар. Бары кэлэн биир аймах, биир уруу эбиппит диэн билсиэхтээхтэр. Эбэбит, эһээбит Хатырыкка төрөөбүт дьоннор».

Күндү дьоннорун үйэтитэр сыаллаах кинилэр төрөөбүт-үөскээбит Төгүрүк диэн аатаах ытык сирдэригэр тэрээһин ааһар. Галин Архипович бу аймах аҕа баһылыга, эһэлэрэ, хос эһэлэрэ эдэр сааһыгар хомойуох иһин күн сириттэн күрэммитэ, ол иһин 9 оҕону дьиэ кэргэн далбар хотуна Софья Петровна атаҕар туруорубута. Бу оҕолор Республика үрдүнэн таҕанан олороллор, ону түмэр соруктаах бу түмсүү тэриллибит.

Саха быһаҕынан кытыйа маһа бэлэмнэниллэр. Онтон бу тарбахтарыгар талааннаах, уус илиилээх Слепцов убайдар эдэр ыччаттарыгар, инникки кэнчээрилэргэр саха иһитин чочуйан таһаарар кистэлэҥнэрин арыйар маастар-кылааһа ыытыллар. Маны таһынан уолаттарга араас тэрээһиннэр ыытыылынныллар.

Виталий Слепцов, Нам улууһун олохтооҕо: «Булт-балык эйгэтигэр уолаттары сыһыарарга эппиэтинэстээхпит».

Бу курдук араас талааннах дьон бу аймахха бааллар. Уруһуйдьуттар муннуктара үгүс оҕону түмтэ. Оҕолор оллоонноон олорон чугас дьоннорун мэтириэттэрин, онтон да атын уруһуйдаатылар.

Алёна Назарова, Нам улууһун олохтооҕо: «Оҕолорго раскраскалата олоробут. Эбээбит уонна эһээбит хаартыскалара, дьиэлэрэ, Саха сирин былааҕа, Хатырык гиэрбэтэ».

Бу курдук үс күн устата араас тэрээһининнэр ытылынныллар. Сүрүн сыал - оҕолору билиһиннэри, төрүччүнү үөрэтии буолар. Сиэннэр олус үөрдүбут диэн санааларын үллэстэллэр.

Ева Антонова, Нам улууһун олохтооҕо: «Эрдэ бэйэбит улаханнык билсибэт буоллахпыт, наһаа элбэхпит, сүүстэн тахсабыт. Оҕолор билистиннэр диэн маннык түмсүүнү былырыыҥҥаттан саҕалаабыппыт».

Биир уруу. Биир хаан. Биир ситим бу курдук төрүччүнү ситимниир тэрээһин атын улуустарга, аймахтарга үтүө холобур эрэ буолар.