Алдаҥҥа чубукуну үөрэтэр холбоһуктаах экспедиция үлэтэ түмүктэннэ

Алдан улууһугар өрөспүүбүлүкэ уонна Хабаровскай кыраай кыраныыссатын чугаһынан Кет-Кап хайатыгар учуонайдар кыһыл кинигэҕэ киирбит чубукулар ахсааннарын ааҕыылара түмүктэннэ. Былырыын айылҕаҕа Президент пуондатын граанын кыайан уонна  сир баайын хостуур "Полюс" хампаанньа өйөбүлүнэн бырайыак олоххо киирдэ. Ааҕыы бөртөлүөтүнэн уонна сиринэн барда. Экспедицияҕа сирдьитинэн хайа булчуттара сырыттылар. 

Степан Борисов, СӨ хайа булчуттарын түмсүүтүн бэрэссэдээтэлэ: «Экспедиция түмүгүнэн 4 чубукуну тыыннаахты туттубут, спутниковай ошейник кэтэттибит. Ол чубуку миграциятын, ханна кэлэрин-барарын учуонайдарбыт көрүөхтээхтэр уонна эбии чинчийиэхтээхтэр».

Моойго тэрили иилэри таһынан, учуонайдар чубуку Аллен диэн сэдэх боруодатын үөрэтэр генетическэй боруобалары ыллылар. Хомуллубут матырыйаал салгыы Москваҕа баран чинчийиллиэҕэ. Оттон спутник сибээстээх хайа кыылларын учуонайдар Дьокуускайтан олорон сайыннары-кыһыннары кэтииллэр. Кинилэр маршруттарын, олохторун, сылдьар экологияларын үөрэтэллэр.    

Иннокентий Слепцов, Биологическай ресурсалар, ураты харыстанар айылҕалаах сирдэр, аан айылгылар дириэксийэлэрин кэтэбилгэ уонна кадастрга салалтатын салайааччыта: «Бу бырайыак сүрүн сыала аҕыйах ахсааннаах Кыһыл кинигэҕэ киирбит чубукулары хайдах гынан харыстыыр ньымалар ылыллыахтаахтар. Эһиил сайын Алдан улууһугар баран эмиэ чубукулары тутаммыт чинчийии үлэтин ыытыахтаахпыт».

Ахсаана аҕыйаан эрэр Аллен чубукуну үөрэтэр, чинчийэр бырайыак 3 сыллааҕы. Онон бу сылларга өрөспүүбүлүкэ соҕуруу оройуоннарын хайаларын туйахтаах кыыллара сүрүн болҕомтоҕо тураллар. Эһиил, ол эһиил Нерюнгри улууһугар баар сис хайаларын чубукулара салгыы ааҕыллыахтара. Оттон быйылгы көрүү түмүгүнэн Алдаҥҥа 350-400 чубуку баара бэлиэтэннэ.