Дьокуускайга "Росамаха суолунан" диэн ааттаах лааҕыр түмүктэннэ

Сылын аайы киин куоракка "Кустук" лааҕырыгар байыаннай-патриотическай хайысхалаах смена үлэлиир. Манна оҕолору түмсүүлээх буоларга, тулуурга, дьулуурга үөрэтэллэр.

Смена быраграамата олус киэн. Хас күн аайы оҕолор бэйэлэрин кыахтарын тургутан көрдүлэр. Уопсайа быйыл 140 оҕо хабыллан сырытта.

Теона, Сахалыына Попова, тэрийээччи: «Оҕолор байыаннай суолларын ааһалларыгар бастаан үөрэнэллэр лааҕырга. Онтукаларын кэлин тутталлар. Физподготовкалара тупсар. Өйдөрө-санаалара эмиэ тупсар. Хамаанда үлэтэ көстөн тахсар».

Хас биирдии хамаандаҕа, 20-тэн тахса оҕо киирэр. Бу күннэр устата хамаандалар биир санаанан салайтаран, сомоҕолоһо сырыттылар. Маны таһынан, оҕолор араас таһымнаах тэрээһиннэргэ кыттыыны ыллылар. Туһалаах үөрэхтэр, маастар-кылаастар буоллулар.

Айыллаана Халланова, кыттааччы: «Полициялар кэлэ сылдьыбыттара, Росгвардия уонна МЧС. Байыаннай подготовкаҕа үөрэпиттэрэ».

Дойдуга тапталы, бэриниилээх буолууну оҕоҕо, ыччакка иҥэрии, иитии үлэтэ Саха сиригэр көхтөөхтүк барар. Онтон маннык лааҕырдар оҕо өйүн-санаатын, дьулуурун сайыннарар, түмсүүлээх буоларга үөрэтэр диэн тэрийээччилэр этэллэр.

Чэмэлиинэ Кундяйцева, Дьокуускайдааҕы ИДЬМ сокуоннай саастарын туола илик оҕолорго инспиэктэрэ: «Аҕыйах бириэмэ иһигэр оҕолор түмсүүлээх эппиэтинэстээх буолалларыгар үөрэнэллэр. Элбэх тэрээһин ыыталлар. Оҕолор сарсыардаттан киэһээҥҥэ диэри дьарыктаах буолаллар».

Инникитин тэрийээччилэр лааҕыра өрөспүүбүлүкэ таһымнаах оҥорор санаалаахтар. Быраграаманы кэҥэтэн, хас да сменанан арааран, өссө элбэх ыччаты хабар былааннаахтар.