Саха сиригэр хаһаайыстыбалар окко киирэн саҕалаатыгар

Дьоҕус тыраахтыр оту бэрт элэҥнэччии мустарар. Кытыл сиргэ сыл аайы уу киирэр буолан ото хойуу. Кэтэх хаһаайыстыбалаах Денис Федоров омурҕан кэриҥэ 2 гектар иэннээх сири аҥаардаппыт. Кини 10 төбө сүөһүлээх. Маныаха сайын устата хас да сиринэн көһө сылдьан оттуур.

Денис Федоров, Хатырык олохтооҕо: «Бу бэһис күммүтүн куурдубуппут, ардахтар мэһэйдээтилэр. Антах өссө быстах сирдэр бааллар онтон арыыга киирэбит».

Отчуттар билигин чугас эргин ходуһалары хомуйаллар. Ол кэннэ ыраах арыыга тахсыахтара. Хатырык нэһилиэгэр оттооһун бу курдук хаамыынан барар.  Маныаха от үлэтэ халлаан туругуттан быһаччы тутулуктаах.

Хатырык  тыа хаһаайыстыбата тэтимнээхтик сайдар нэһилиэктэриттэн биирдэстэрэ. Манна сыллата сүөһү ахсаана элбиир.  Холобур, быйыл икки эдэр фермер эбиллибит. Онон ходуһаҕа тахсааччы уонна биллэн турар оттонор от кээмэйэ улаатар.

Айаал Дьяконов, Хатырык нэһилиэгин баһылыгын солбуйааччы: «Былырыын 1075 туоннаны оттообут эбит буоллахтарына, быйыл өссө ол түмүгү куоһаран 1500 кэриҥэ туоннаны нэһилиэкпит олохтоохторо, улахан хаһаайыстыбалар оттуохтаахтар».

Номнуо хомуллан рулоннаммыт от дьиэ таһыгар сааһыланар. Нэһилиэк бөдөҥ хаһаайыстыбата чугастааҕы сирдэрин бүтэрбит. Алексей Слепцов дьиэ кэргэнинэн бааһынай хаһаайыстыбалар, кыстыгы 300 туонна отунан туорууллар. Онон күүстээх үлэ дьэ саҕаламмыт. 

Алексей Слепцов, Хатырык олохтооҕо: «Бэҕэһээ өрөмүөн, ардах түспүтүгэр тохтоотубут».

От кэмэ буолан нэһилиэк иһэ күө-дьаа. Ким оттуу барар, ким тиэйэр, ким тиэхиньикэтин оҥостор. Аҕалыы уол Лоҥхолор оҕустара киирээри тыраахтырдарын өрөмүөннүүллэр.

Лоҥхо Тэтим Буурхат: «Саамай үлэһит тиэхиньикэбит буоллаҕа тыраахтарбыт. Маны барытын хомуйаммыт, алдьаммытын барытын оҥоробут».

Онон былдьаһыктаах күннэри баттаһа Хатырыктар быйылгы от былаанын толорорго бэлэмнэр.