Ууга хонтуруол күүһүрэр
Эрэһиинэ тыылаах киһини иниспиэктэрдэр тохтотоору анал тыас биэрэллэр. Ол эрэн суудуналаах киһи тохтообот, кыһанан да көрбөт. Ону кэнниттэн сырсан кытылга тиксэбит. "Истибэтим" диэн хорйудаата, туһааннаах докумуоннарын бэрэбиэркэ, өйдөтөр листовканы биэрии кэннэ салгыы устабыт.
"ГИМС үлэһиттэрин кытта холбоһуктаах рейдэҕэ сылдьабыт. Бу курдук өрүс устун кэрийэ сылдьан күүһүрдүллүбүт бэрээдэк кэмигэр күн аайы тохтотоллор. Билигин биһиги көрөрбүтүгэр биир оҥочо иһэр. Ону тохтотуохпут уонна кэпсэтиэхпит", - Мария Дмитриева, корреспондент.
Тохтоппут дьоммут балыксыттар эбит. Байанай бэлэҕин таһааран көрдөрөллөр. Сордоҥу кытта икки алыһар хаптарбыттар. Уопуттаах балыксыттар докумуоннара барыта орун оннугар, ууга сэрэхтээх буолуу иһитиннэриитин болҕойон иһиттилэр.
Петр Оконешников: "Бүгүн тыыбытын ыстаансыйаҕа саҥа аҕаллыбыт. Ону бэрэбиэркэлии таарыйа чугас эргин баран кэллибит. Уу элбэх буолан балык аҕыйах. Маннык бэрэбиэркэ олус наадалаах, тоҕо диэтэр уу сэрэхтээҕэ биллэр".
Билигин дойду үрдүнэн ууга кэтээн көрүү күүһүрдүллэн турар. Холобур, Дьокуускай эргин Мэҥэ Хаҥалас, Жатай уонна киин куорат иниспиэктэрдэрэ бэрэбиэркэҕэ күннэтэ тахсаллар.
Павел Курбатов, ЫБММ Саха сиринээҕи салалтатын дьоҕус суудуналарга судаарыстыбаннай иниспиэксийэ Дьокуускайдааҕы салаатын судаарыстыбаннай иниспиэктэрэ: "Өрүскэ тахсааччы олус элбэх. Ким сынньана, ким балыктыы, ким лууктуу бараллар. Биһиги сэрэтэр кэпсэтиилэри ыытабыт. Дьоҥҥо ууга хайдах дьаһанан сылдьары, быыһыыр сэлиэччик хайаан да баар буолуохтааҕын туһунан этэбит".
Итини сэргэ аал докумуонугар улахан болҕомтону уураллар. Өрүскэ кэтээн көрүүбүтүн салгыыбыт. Айаннаан иһэр икки киһини тохтотобут. Бу сырыыга арыыттан күөх луук хомуйан иһэллэр эбит. Мотуордаах тыыны ыыппыта 6 сылыгар барбыт, онон быйыл докумуонун саҥардыбыт.
Ульяна, Юрий Афонскайдар: "Луук үүнүүтэ быйыл мөлтөх. Ол эрэн син үүммүт. Тыыланыахпытыттан сыл аайы сылдьабыт. Быраабыланы барытын тутуһабыт".
ГИМС иниспиэктэрдэрэ өрүс тырааныспарын тэҥэ сөтүөлээччилэри эмиэ кэтээн көрөллөр. Ол курдук рейдэ кэмигэр көҥүлэ суох сиргэ сылдьар оҕолору кытта кэпсэтии ыыттыллар. Итиэннэ быыһааччылар баар сирдэригэр баралларын модьуйдулар. Ити курдук сайын устата холбоһуктаах рейдэлэр салҕаныахтара.
