"Дьулуур" спартакиада саҕаланна

Дьокуускайга бэс ыйын 16 күнүттэн саҕалаан адаптивнай спорт көрүҥнэригэр спартакиада ыытыллар. Манна өрөспүүбүлүкэ  араас улуустарыттан доруобуйаларынан хааччахтаах дьоннор мустаннар бэйэлэрин күүстэрин, кыахтарын тургутан көрөллөр. Быйыл спорт хас да көрүҥэр улахан күрэх ааһар. Оннук курдук волейболу олорон оонньооһуҥҥа, голболга, сүүрүүгэ, остуол тенниһэ, саанан уонна ох саанан ытыыга, дуобакка, саахымакка 500 тахса спортсмен кыттыыны ылар.   

Василий Олёнов, чэпчэки атлетикаҕа сүрүн судьуйа: "Чэпчэки атлетикаҕа 238 киһи кыттыыны ыла сылдьар. Уопсайа спартакиадаҕа 500 тахса спортсмен кыттар. Барыта 19 улуустар кэллилэр".

Сахалыы параолимпийскай оонньуулар быйыл 15 төгүлүн ыытыллаллар. Түөрт сыл аннараа өттүгэр Амма улууһугар ааспыт спартакиадаҕа 1500 тахса киһи кыттыыны ылбыта. Үөһэ Бүлүүттэн кытта кэлбит Ульяна Захарова 2020 сылтан саҕалаан араас спорт көрүҥнэрин боруобалаан көрбүт, остуол тенниһигэр, хабылыкка, хаамыскаҕа дьарыктанан баран миэнэ буолбатах диэбит. Билигин хайаан даҕаны кыайыам диэн эрэллээх кэлбит.

Ульяна Захарова, спартакиада кыттыылааҕа: "Ядроны быраҕыы диэн баарын билэммин, онно бэлэмнэнэн бу улахан күрэххэ кытта кэлэн турабын".

Онтон Амма улууһун спортсменката Виктория Петрова ядрону быраҕыынан дьарыктаммыта  ыраатта. Билиҥҥи кэм туругунан дойду чэпчэки атлетикатын сүүмэрдэммит хамаандатыгар баар. Ол да буоллар син биир күн ахсын тохтообокко эрчиллэр. Маннык чулуу кыттыылаахтар баар буоланнар күрэх олус интэриэһинэйдик ыытыллара күүтүллэр.

Виктория Петрова, спартакиада кыттыылааҕа: "Сэттис сылын дьарыктанабын. Спорт маастарын нуорматын толордум. Россия биэс төгүллээх чемпионабын".

Күрэх бүтүн дойду "Спорт России" бырагыраама чэрчитинэн ыытыллар. Спартакида үөрүүлээх арыллыыта бүгүн киэһээ буолуоҕа.