Дьокуускайга 4 сыллааҕыта уу аалын сэҥээрээччилэрин түмсүүтэ тэриллибитэ

Саха-Корейскай оскуола 8 кылааһын үөрэнээччитэ Диана Суздалова лааҕыр оҕолорун кытары уу аалынан уста кэлбит. Бу кини номнуо хаһыс да кэлиитэ, теоретическай чааһын ааһан, аны дьиҥнээхтии эрдэр. Оҥочотун номнуо билэн, хайа хайысхаҕа эрдиннэххинэ, ханна устарын барытын билбит.

Диана Суздалова, Саха-Корейскай оскуола 8 кылааһын үөрэнээччитэ: «Наһаа сөбүлүүбүн тыыннан устарбын. Сүүрүк, уу, астык».

2018 сылаахха Дьокуускай куорат олохтооҕо Сергей Помогаев бэйэтэ уу аалын оҥорорго санаммыт. 4 сыл устата 15 устуука оҕолорго сөптөөх яхта курдук оҥочолору илиинэн таҥан таһаарбыт. Маны олоххо киллэрэригэр Дойду президенын гранын сүүйэн, онтон үбүлэнэн уу аалларын оҥорбут. Ол кэнниттэн биир санаалаахтарын түмэн яхта түмсүүтүн тэрийэр.  Сүрүн сыал үүнэн эрэр көлүөнэни бу эйгэҕэ сыһыарыы, үөрэтии буолар.

Сергей Помогаев, түмсүү салайааччыта: «Детям можно с 6 лет, но стараемся с 7 лет брать, а там уже без ограничения по возрасту. У нас есть яхты для маленьких и больших ребят. У нас есть дети, которые уже ходят по 3-4 года. А есть и те, кто поступил в институт водного транспорта. Нас называют кузницей речников».

Чахчы, түмсүү тэриллиэҕиттэн улахан дьонтон саҕалаан оҕолорго диэри үгүс киһи кэлэн уу спордун биир көрүҥэр үөрэммиттэр. Маныаха Дьокуускай куорат олохтоохторо уонна ыалдьыттара кэлэн паруһунан, катамаранынан, кыра оҥочолорунан устарга үөрэниэхтэрин, маныаха кылгас сайыммыттыгар туризм биир көрүҥэр эбэҕэ кэлэн сынньаннан, эрдэн, устуохтарын сөп эбит.

Биллэн туран манна ууга сэрэхтээх буолуу быраабылаларын тутуһаллар. Ыксаллаах быһыы-майгы министиэристибэтин дьоҕус суудуналарга инспекциятын кытары ыкса үлэ барар. Холобура, билигин Өрөспүүбүлүкэ үрдүнэн ууга сэрэхтээх буолуу ыйынньыга ыытылла турар.

Татьяна Степанова, ЫБМ СӨ салалтатын уу эбийиэктэригэр куттала суох буолууну хааччыйар салаа салайааччытын солбуйааччы: «Өрөспүүбүлүкэ уу эбийиэктэригэр сэрэхтээх буолуу ыйа биллэриллибитэ. Ону тэҥэ “Вода – безопасная территория” аахсыйа ыытыллар. Бу кэмҥэ уу эбийиэктэригэр нэһилиэнньэни кытта күүстээх сэрэтии үлэтэ барар. Ол курдук, профилактическай рейдэр, административнай практика уонна биирдиилээн кэпсэтиилэр».

Билигин тустаах түмсүү Саха сирин уу аалын спордун федерациятын кытары ыкса үлэлэһэр. Инникки былаан дойду таһымнаах күрэхтэргэ кыттыы, итиэннэ өссө да элбэх дьону бу эйгэҕэ угуйуу буолар.