Үйэни уҥуордаан кэлбит мас тутуулаах Таҥара дьиэтэ Үөһээ Бүлүү улууһун Боотулуу нэһилиэгэр баар

Боотулуу Таҥара дьиэтин куолакалын лыҥкынас тыаһа бөһүөлэккэ суолталаах тэрээһин буолбутун биллэрэр. Дьон-сэргэ кутун тутар, тохтотон, болҕомтотун тардар тыаһы номнуо уонтан тахса сыл Семен Семенович Долгунов таһаарар. Төрүт олохтоох киһиэхэ 120 сыл харыстанан турар дьиэ, хара төрүөҕүттэн, бөһүөлэгин солбуллубат биир кэрэ көстүүтэ буолар.     

Семён Долгунов, куолакалы тыаһатааччы: «Делегациялар, интириэһиргиир дьон кэллэҕинэ тыаһатааччыбыт. Таҥара дьиэлэрин уопсайынан Арассыыйа үрдүнэн чөлүгэр түһэриигэ үлэлэр бараллар, саҥа дьиэлэри сүрдээҕин туталлар быһылаах. Биһиэнэ умнуллан хаалла».

Николай Чудотворец Таҥара дьиэтэ 1901 сыллаахха тутуллубута уонна 1906 сыллаахха сүрэхтэммитэ. Манна 20-чэ сыл тухары Иннокентий Синицын, Климентий Заморщиков, Николай Сизых диэн таҥара үлэһиттэринэн сулууспалаабыттара. 1930 сыллар саҕаларына 5 нэһилиэк дьонун түмэ тардан, биир итэҕэллээбит сибэтиэй сир урусхалламмыта.

Алексей Герасимов, 2007-2017сс. Боотулуу нэһилиэгин баһылыга: «Куолакалларын устубуттар үһү, куполларын эрбээбиттэр. Дьиэ бэйэтинэн хаалан турда».

История чахчыта хайдах баарынан ылыныллар. Ол эрэн, үйэни уҥуордаан кэлбит, билигин да Бүлүү бөлөх улуустарыгар соҕотоҕун чоройон хаалбыт, мас таҥара дьиэтэ кэрэ көстүүтүнэн сөхтөрөр. Онуоха олохтоох дьон харыстаан хаалларар баҕаларын күүһэ иккис тыыны биэрбитэ.

Алексей Герасимов, 2007-2017сс. Боотулуу нэһилиэгин баһылыга: «Сабыс саҥа 7 куолакал уонна купол кэлбитэ».

1976 сыллаахха Саха АССР култууратын, историятын харыстанар пааматынньыктарын испиэһэктэригэр киирбит эбийиэк 2023 сыллаахха билиҥҥи баар кыраныыссата чопчуламмыта, күрүөлэммитэ. Акылаат сытыйбыта олохтоох дьону долгутар.

Михаил Петров, "Боотулуу нэһилиэгэ" МТ баһылыгын солбуйааччы: «Ыалдьыттар анаан кэлэллэр куолакал тыаһын истэ».

Сөргүтүү үлэтэ бардар, инниктин нэһилиэк историятын биир бас-көс дьиэтэ туризм сайдар суолун тэлиэҕэ, өссө да уһун үйэлэниэҕэ диэн эрэллээхтэр.  Боотулуулар киэн туттар Таҥара дьиэлэрэ билигин даҕаны тыаһынан ыраахтан-чугастан дьону угуйар.