Дьокуускайга үүнээйи атыыта көхтөөхтүк ыытыллар

Сылын ахсын тутуу ырыынага баччаларга үүнээйи ырыынагар кубулуйар. Сүүһүнэн рассада, дьэрэкээн сибэкки хото тэлгэммит. Бу барыта чааһынайдар, идэтийбит оҕуруоччуттар бүөбэйдээн үүннэрбит күөх битэмииннэрэ. Быйыл рассада атыытын ырыынак тас өттүгэр көһөрбүттэр. Дьон кэлиитэ көхтөөх, ким сибэкки, оттон ким оҕуруот аһын рассадатын атыылаһар.

Августа, Гаврил Дягилевтар сыллата мантан кэлэн рассада атыылаһаллар. Дачаларыгар оҕуруот аһын, сибэкки эгэлгэтин олордоллор. Сорох рассаданы бэйэбит үүннэрэбит, сорҕотун атыылаһабыт диэн кэпсииллэр.

 Августа, Гаврил  Дягилевтар, Дьокуускай олохтоохторо: "Помидор, клубника көрөбүт. Клубниканы эрдэ бэйэбит олордор этибит. Билигин сааһыран олордубаппыт, түбүгүрбэппит. Уонна биһиэнэ арыый да иинэҕэс буолааччы. Сыаната сөбүгэр. Мантан ыллахха доруобай буолан аһы биэрээччи". 

Сыллата оҕуруот аһын олунньу ыйтан саҕалаан олордон, маннык анаан-минээн атыыга таһаараллар. Былырыыҥҥытааҕар сыана ортотунан 10-15 % эбиллибит.

Дмитрий Орлов, атыыһыт: "Сыана үрдээтэ. Холобур, оҕурсу эрдэ 60 солкуобай этэ быйыл 70-80 солкуобай буолла".  

Оҕуруот аһа ортотунан 50-100 солкуобайтан ыла саҕаланар. Оҕурсу, помидор, сүбүөкүлэ, хаппыыста, биэрэс тарҕаммыт суортара хас эрээт аайы кэчигирэһэллэр. Оттон сибэкки рассадата көрүҥүттэн, элбэҕиттэн көрөн ортотунан 100 солкуобайтан 3 тыһыынчаҕа диэри сыанаҕа атыылынар. Снежана Слепцова дьонун кытта сибэкки олордуутунан атыыга диэн анаан-минээн дьарыктанар.

Снежана Слепцова, атыыһыт: "Петунияттан саҕалаан барыта баар. Бу сибэкки бары көрүҥүн атыылыыбыт. Ону тэҥэ бархатцы, шафран. Дьон үксүн петунияны ылаллар".  

Петуниялар суортарыттан көрөн сыаната араастаһар, эриэккэс сибэккилэр сыаналара эмиэ добуоччу. Клубника, саад дьэдьэнэ эмиэ элбэх. Сыаната 450 солкуобайтан саҕаланар. Дьэрэкээн өҥнөөх сибэккилэр уйгу сайыммыт кэрэтин көрдөрөрдүү үүнэн силигилээн туралларын көрүөххэ үчүгэйэ.

Татьяна Николаева, Дьокуускай олохтооҕо: "Сыаната былырыыҥҥыттан үрдээбит. Олордууга наһаа үлэлээх, биллэн турар. Онон бэлэм рассаданы олордор олус үчүгэй". 

Сүрэхтээх дьон бүөбэйдээн, буору, сиэмэни кытта эрдэттэн тустан, өлгөм үүнүүнү ылан атыыга таһааран, дохуот аахсар. Рассада дьаарбаҥкатыгар сыллата саҥа, сонун үүнээйилэр киирэн иһэллэр,онон атыылаһааччы ахсаана аҕыйаабат.