"Бэргэн ооньуулара" күрэхтэһии сүүмэрдиир түһүмэҕэ түмүктэннэ

Ньурба улууһуттан кэлэ сылдьар Айтал Егоров спорт төрүт көрүҥнэринэн ситиһиилээхтик дьарыктанар. Бу Бэргэн оонньуулара саҕаланыахтарыттан номнуо 4 сылын көтүппэккэ кыттар. Айтал хас да күн түмүгүнэн бириистээх миэстэҕэ иһэр. 

Айтал Егоров, күрэхтэһии кыттыылааҕа, Ньурба улууһа: «Үс төгүл үскэ үһүс миэстэ буолбутум, онтон 400 миэтэрэ сүүрүүгэ иккис миэстэ буолбутум. Тутум эргииргэ отуту гынабын. Уопсайга иккис баран иһэбин».

Бэргэн ооньууларыгар 2008-2015 сыллаах төрүөх оҕолор кытталлар. Быйыл күрэхтэһиигэ Дьокуускайтан уонна 16 улуустан уопсайа 228 оҕо кытынна. Сылын ахсын күрэхтэһии таһыма үрдээн кыттааччытын ахсаана элбээн иһэр. Бастакы күн 2008-2009 сыллардааҕы улахан бөлөх оҕолоро күрэхтэстилэр. Кинилэртэн 8 бастыҥ кыттааччы сүүмэрдэнэн аны сайын Туймаада ыһыаҕар ыытыллар оонньуу финалыгар кыттыаҕа.

Дмитрий Саввинов, "Бэргэн оонньуулара" күрэхтэһии бас судьуйата: «Бастатан туран бу бэйэбит саха дьоно төрүт көрүҥмүт буолар. Улахаттар 5 көрүҥҥэ кытталлар, кыралар үскэ».

Многоборье, ол эбэтэр дэгит күрэхтэһии оҕолор ортолоругар улахан интэриэһи ылар. Ким ыстаныыга, сүүрүүгэ, тутум эргииргэ, хапсаҕайга, маска ылсан туран дьарыктанар. Кыра бөҕөстөр тутум эргиири баһылаан 70-ҥа диэри эргийэллэринэн киэн туттуохтарын тутталлар. 

Алёша Скрябин, күрэхтэһии кыттыылааҕа, Хаҥалас улууһа: «70 эргийэн бастаатым быһылаах. Дьиэбэр күн аайы 80 эргийэбин».

Чурапчы улууһуттан кэлбит Антон Игнатьев бу аан бастакы улахан күрэхтэһиитэ. Ыстаныы уонна хапсаҕай көрүҥнэрин ыарырҕатабын диэн кэпсиир. Хапсаҕайга бастакы эргииргэ утарсааччытын эрэллээхтик кыайан санаата көтөҕүлүннэ. 

Антон Игнатьев, күрэхтэһии кыттыылааҕа, Чурапчы улууһа: «Бэйэм санаабар үчүгэйдик дии саныыбын. Бастакы улахан күрэҕим, долгуйа сылдьабын».

Күрэхтэһиигэ куорат кулууптарын иитиллээччилэрэ үрдүк көрдөрүүлээхтэр, кинилэри Дыгын оонньуутун бастыҥ спортсменнара эрчийэллэр.

Станислав Соловьев, мас тардыһыытыгар тренер, Нам улууһа: «Оҕолор мотивациялаахтар эбит, ону таһынан атын улуус оҕолорун көрөн киһи сөҕөр. Бары формалара игин үчүгэй баҕайы эбит. Оҕо сайдарыгар саамай наадалаах көрүҥ дии саныыбын».

Бэргэн оонньуулара саха норуота бары сөбүлүүр Дыгын оонньууларыгар кыраларыттан бэлэмнэнии быһыытынан сыаналанар. Бэргэн оонньууттан тахсыбыт бөҕөстөр Дыгыҥҥа путевка сүүйэллэрэ ону туоһулуур.