Ириэрии кэмигэр киин куорат уулуссаларыгар хаар уутун оботторуу үлэтэ элбиир

Ириэрии саҕаланан кыһын устаат мунньуллубут, дьапталҕаммыт хаар чалбахха кубулуйда. Намыһах сирдэр ордук ууланнылар. Онуоха ууну түргэнник аһардарга лотуоктары ырастааһын тэтимнээхтик барар. Бэлэмнэнии үлэтэ кулун тутартан саҕаламмыта уонна күн бүгүҥҥэ диэри ыытыллар.

Сыл ахсын саамай элбэх уу Залог уулуссаларыгар мунньуллар ол иһин ол эҥэр улахан болҕомто ууруллар. Ууну тиэйэргэ уонна оргутан паар таһааран мууһу уулларарга көмө буолар анал техника. Күҥҥэ 30 тахса араас кээмэйдээх кирдээх ууну таһар тиэхиникэ үлэлиир.

Александр Павлов, "Якутдорстрой" тэрилтэ үлэһитэ: «Өссө 13 электронасос холбоотубут».

Үлэһиттэр этэллэринэн үлэҕэ саамай кутталлааҕа диэн турбаны булбакка суолу алдьатан уу ыытар. Ол иһин инженердар эрдэттэн кэлэннэр суолу кээмэйдээн турба ханан сытарын ыйан биэрэллэр.

Ону тэҥэ мунньуллубут ууну утары Жилкомсервис тэрилтэ эмиэ үлэлиир. Үлэһиттэр камеранан көрөн, дьон үмсэринэн чалбаҕы оботтороллор. Күн - дьыл сылыйан иһэринэн үлэ хас да бүк элбээбитин бэлиэтииллэр. Онон кэлэр нэдиэлэҕэ өссө 30 анал тиэхиньикэ икки сменэнэн таһаарыахтара. Оттон эмискэ ириэрэр түгэнигэр түүҥҥү үлэни эмиэ былааныыллар.

Юрий Спиридонов, "Жилкомсервис" тэрилтэ дириэктэрэ: «Куоракка 15 тиэхиньикэ үлэлии сылдьар. Сарсыарда 10:00 киэһээ 22:00 дылы. 7100 куубу хачайдаатыбыт, былырыыҥҥы курдук көрдөрүү».

Быйыл саас хойуу сөҥүүлээх күннэр тураннар, уулуссаларга, тротуардарга, дьиэ тиэргэннэригэр хаар мунньуллубута баар суол. Ол эрэн, олох - дьаһах, коммунальнай хаһаайыстыба исписэлиистэрин систиэмэлээх үлэлэрин көмөлөрүнэн улахан сылыйыыга диэри үлэни үмүрүтэр сорук турар. Ыраастаныы олохтоох дьаһалта хонтуруолугар турар.