Өрөспүүбүлүкэҕэ мууһу хараардыы уонна эрбээһин үлэлэрэ түмүктэнэн эрэллэр

Күүстээх тиэхиньикэ мууһу чэпчэкитик быһар.  Бу сыллата харыы үөскээбэтин, муус дэбигистик аастын диэн оҥоһуллар олус көдьүүстээх миэрэ. Нам улууһугар быйыл үөдэй, Партизан уонна Арбын аннынан эбии үп көрүллэн эрбэнэр уонна хараардыллар учаастак эбилиннэ.

Картаҕа көстөрүн курдук ромб быһыылаах гына эрбэнэр, оччоҕо муус холбутук бытарыйан устар. Нам улууһа сыл аайы халаанныыр кутталлаах оройуоннарга киирэр. Онон быйыл эбиллэн уопсайа 121 гектар сиргэ үлэ ыытыллар.

Пётр Аргунов, Өлүөнэтээҕи уу салалтатын салайааччы: «14 улууска 92 учаастакка арааран мууһу эрбиибит. Мууһу хараардыы үлэтэ 85 учаастакка буолар. Уопсай иэнэ 852 га».

Маны сэргэ сыллата мууһу кэбирэтэн хараардыы үлэтэ барар. Кумах булкаастаах таас чох кыыбылын кутуох иннинэ ыраастыыллар. Быйыл сорох сиргэ хаар олус халыҥ буолан, ыраастааһын үлэтэ үгүс сыраны эрэйдэ. Гидрологтар этэллэринэн кэккэ улуустарга уу элбэх буолара күүтүллэр.   

Алёна Лавернова, гидрометеосулууспа сүрүннүүр гидролога: «Сааскы халаан уута нуорма кэриэҥэр буолар. Ол эрээри хаарбыт халыҥа Халыма, Индигиир, Дьааҥы өрүскэ быйыл элбэх түспүт буолан онно уу элбэх буолуоҕа».

Оттон Халыма Индигир өрүстэргэ муус нуорматыттан эрдэ хамсыа диэн сылыктыыллар. Халааны сэргэ ойуур баһаардарыгар бэлэм тэҥҥэ барар. Ол курдук бу салааҕа быйыл үбүлээһин эмиэ улааттта, 5,5 миллиард көрүлүннэ. Маныаха быйыл өрөспүүбүлүкэҕэ ойуур баһаарын куттала үрдүк. Бу туһунан Росгидромет салайааччыта Игорь Шумаков иһитиннэрдэ. Килиимэт уларыйыытынан сибээстээн, быйыл баһаар кэмэ эрдэ саҕаланыа уонна хойут түмүктэниэ диэн  сабаҕалыыллар. Маныаха эбии үбүлээһинтэн умуруорааччы ахсаанын элбэтиэхтэрэ.

Николай Никитин, СӨ ойуур харыстабылын уонна чөлүгэр түһэрии департаменын салайааччы: «2025 сыллаахха ойуур баһаарын умуруорааччылара элбээннэр оперативноспыт, холобура бастакы күҥҥэ умулларбыт баһаардарбыт уопсай ахсаантан ыллахха 63% этэ. Саха сиригэр хаһан да буолбатах таһымнаах көрдөрүү буолар».

Ити курдук бэлэмнэнии үлэтэ күүскэ барар. Ойуур уота турдаҕына түргэнник дьаһанар мобильнай бөлөхтөр тэрилиннилэр. Пилота суох авиацияны туттуу күүһүрдүлүннэ.