Хаар полигона номнуо туолла, саҥа сири олохтоохтор утараллар

Птицефабрика оройуонугар быстах кэмҥэ үлэлиир хаары тутар полигон астылар. Бу иннинэ үлэлии турбут Сэбиэскэй Аармыйа 50 сыла уулуссатыҕа баар полигон бүтүүннүү туолан, быстах кэмҥэ хаары туппат буоллулар. Ол эрээри саҥа быһаарыыны бу эргин олохтоохторо сөбүлэспэккэ утаралларын биллэрэллэр. Мантан чугас 3 ыал олорор, бу кинилэр бэйэлэрэ оҥотторбут күннэтэ айанныыр суоллара буолар, олох чугас Сэргэлээх күөлэ сытар. Куорат хаара барыта манна кэлэн кутуллуннаҕына мантан саас, сайын ууга барабыт диэн айманаллар.

Мария Павлова, Дьокуускай олохтооҕо: «Күн аайы оҕолорбун 4-5 оскуолаҕа таһабын. Ыалларбыт оҕолрун уһуйааҥҥа таһаллар. Хаһан да маннык хаар кута иликтэрэр, бу быйыл бастакылара. Баскыһыанньаттан кута сылдьаллар. 10 сылы быһа кутан оҥорбут суолбут күөл буолар буолла быһылаах. Айылҕа харыстабылын министиэристибэтэ кэлэ сылдьыбыта, биһигини кытта сөбүлэҥ суох диэн эттилэр».

Быйыл кыһын Дьокуускайга аан бастаан хаар аҕыйах түспүтэ, онтон сааһыары хас да ыйдааҕы нуорманы аһарар сөҥүү аҕыйах нэдиэлэ устата түһэн хаары кытта охсуһуу түбүгэ үүннэ. Күүннэри-түүннэри хаары ыраастыыр үлэ толору күүһүнэн ыытыллар эрээри кыһалҕа кыайтарбат. Бүгүҥҥү күҥҥэ элбэх квартиралаах олорор дьиэлэртэн, тэрилтэлэртэн хаары тиэйии-таһыы үлэтэ бара турар. Маныаха ыраастаммыт хаар анаммыт полигоҥҥа эрэ сүөкэниэхтээх.

Егор Семёнов, Дьокуускай куорат административнай сокуон тиһилигин толоруллуутун салаатын начальнига: «Күөлгэ, өрүскэ, уулуссаларга, Күөх Хонууга хаар тоҕуу бобуулаах, буруйу кэһээччилэр административнай эппиэккэ тардыллаллар».  

«Народнай фронт» общественнай тэрилтэ кыттыылаахтара суолга-иискэ хаары ыраастааһын үлэтэ хайдах барарын бэрэбиэркэлииллэр. Элбэх уулуссаны көрдүлэр, чуолаан Кальвица, Федор Попов уонна Свердлов аатынан уулуссаларга хаар ыраастаммытын кэннэ тиэллибэккэ хааларын бэлиэтииллэр. Бу маннык көстүү куорат үгүс суолугар хатыланар.

Алексей Лаптев, СӨ "Народный фронт" общественнай тэрилтэ бэрэссэдэтэлэ: «3 күн иһинэн таһаарыахтаах этилэр. Ону бу хаһыс да күнүн сытар, туох да бэлиэ суох. Бу сотору барыта чалбах буолуо, уонна аспаалы алдьатыа».

Общественниктар кэһиилэри барытын тиһэн, хонтуруоллуур уорганнарга тиэрдиэхтэрэ. Мантан саас аны ууга барыы кыһалҕата күөрэйиэ турдаҕа.