Олохтоох оҥорон таһаарыы көрүҥэ күннэтэ кэҥиир

Ууллубут ынах арыытын дыргыл сыта лабораторияны ылар. Маныаха өссө эбии мүөтү эппиттэригэр минньигэс сыт өссө күүһүрэр. Бу кыһыҥҥы тымныыттан, тыалтан уоһу харыстыыр бальзам оҥоһуллар. Ыҥырыа иитээччи  Күннэй Тимофеева косметиката көстөрүн курдук барыта олохтоох бородууксуйаттан.

Саха сиригэр оҥоһуллан тахсар косметика сүрүн састааба ыҥырыа. Бу харамай туһатын бастаан үөрэтии, онтон холоон көрүү кэннэ сэбэрэни тупсарар араас кремнар уонна эмтээх маастар оҥоһулаллар. Итини сэргэ медицинэ институтун кытта ыкса үлэлэһии түмүгэр билигин айах иһин гигиенатыгар туһаныллар бородууксуйаны  холоон көрөллөр.

Марианна Соловьева, М.К. Аммосов аатынан ХИФУ доцена, биологическай билим кандидата: «Билигин биһиги лабараториябыт направлениятын кэҥэтэн эрэр. Меицинскэй институт үлэһиттэрин кытары патеннары суруйбуппут айах иһин ыарыыларын чинчийиитигэр. Ол патеннары туттан саҥа бородууксуйаларга тахсан эрэбит. Тиис сууйар паастатыттан саҕалаан, айах иһин сайҕанарга дылы».

Косметика Арктическай инновационнай киин иһинэн тахсар. Ол аата оҥорон таһаарыы билимҥэ тирэҕирэр. Хас биирдии бородууксуйа састааба ураты, айылҕа эмтиир тупсарар кыаҕын толору арыйар. Холобур, хатыыс хабаҕа састааптаах кремнэри уонна маастары дьон олус сөбүлээбит. Инникитин химик идэтин баһылыахтаах устудьуоннар, бэйэлэрин наукаҕа бастакы хардыыларын олохтоох косметикаҕа холоноллор.

Дайаана Каратаева, Арктикатааҕы инновационнай киин билим үлэһитэ, ХИФУ магистрана: «Косметика разрабатывается из местного сырья. Лекарственные растения, а также сырье животного происхождения. Тимьян мы собираем во время летней практики. Местный воск берем на пасеке».

Бу ыйыллыбыт олохтоох эмтээх оттор буккаастаах араас кремнэри оҥорон таһаараллар. Холобур, сирэй тириитин эдэригэр түһэрэр, сымнатар, күнтэн харыстыыр. 3 сыл иһигэр көрүҥнэрэ биллэ эбиллибит. Ыҥырыаны иитиигэ улахан уопуттаах Күннэй Тимофеева, бу дьоҕурун билими кытта дьүөрэлии тутан, тигээйи туһатын өссө хаҥатар былааннаах.

Күннэй Тимофеева, "Маас" бренд төрүттээччитэ: «Кэлэр сылларга биһиги айылҕаны үөрэтэр, чинчийэр институту кытта салҕыы үлэлэһэр былааннаахпыт. Саха сирин дьонугар туһалаах элбэх бородууксуйаны таһаарыахпыт диэн эрэннэрэбит».

Онон сотору кэминэн тиис суунар пааста, айах, тирии бааһын эмтиир маастар оҥоһуллан тахсыахтара.