Быйыл тыа хаһаайыстыбатын салаатыгар 13 млрд үп көрүллэн турар

Василий Петров - эдэр фермер. Икки сыллааҕыта Агростартап грааныгар кыттан судаарыстыбаттан көмө үп-харчы ылан төрөппүттэрин хаһаайыстыбатын сайыннарыыга ылсан үлэлии-хамсыы сылдьар. Ааспыт сылга  эмиэ туһааннаах бырагыраамаҕа хапсан улахан хотон туттубута. 

Василий Петров, бааһынай хаһаайыстыба салайааччыта: «Былырыын “Объект малой мощности” диэн бырагыраамаҕа хаалсаммын саҥа хотон тутуннум 70 төбөлөөх, 502 кв.м., хомойуох иһин харчыбыт хойутаан түһэн киирбэтибит. Ол эрэн, быйыл күһүн 100% киириэхпит диэн эрэллээхпин».

Василий кыратыттан тыа хаһаайыстыбатыгар сыстан ийэлээх-аҕатыгар ынах-сүөһү көрүүтүгэр көмөлөһөн улааппыта. Билигин бэйэтэ хаһаайыстыба тэринэн 40-ча төбө сүөһүлээх, онтон 24 ыанар ынах, билигин эргэ хотоҥҥо кыстаан тураллар. Саҥа хотонун аны күһүн толору бэлэм гынан хаһаайыстыбатын кэҥэтэр соруктаах.

Василий Петров, бааһынай хаһаайыстыба салайааччыта: «40 төбөлөөхпүн уонна саҥа хотоммор ынахпын элбэтиэм диэн эрэллээхпин».

Сотору кэминэн ынах маассабай төрөөһүнэ саҕаланыа. Билигин хаһаайыстыбаларга саҥа төрүөх кэлэ турар. Күннэтэ кырачаан ньирэйдэр күн сирин көрөн аны саас хороһон улаатыахтара турдаҕа.

Оҕуруот аһын хаһаайыстыбатыгар билигин түбүктээх кэм. Ол курдук сиэмэ хортуоппуйунан дьарыктанааччылар хортуоппуйдарын сыымайдыыр үгэннэрэ. Александр Жирков бэйэтэ оҕуруот хаһаайыстыбалаах, элита суорт сиэмэ хортуоппуйу олордор. Ред Скарлет суорду Омскай куорат научнай кииниттэн атыылаһан ылсан үүннэрэр. 

Александр Жирков, сиэмэ хортуоппуй хаһаайыстыбатын салайааччы: «Үчүгэй хаачыстыбалаах диэн сертификаттаах хортуоппуй. Былырыын үчүгэй учаастактарбыттан 28-30 туонна хортуоппуй ылбытым бир гааттан. Атын суорталартан кини эрдэлиир. Ол иһин бөдөҥ буолан үүнэр уонна аһа элбэх буолар».

Былырыын үрдүк үүнүүнү ылан быйыл эмиэ көрдөрүүлэрин түһэрбэт соруктаахтар. Хортуоппуйдарын аҥарын атыылаан билигин аны сааскы ыһыыларыгар бэлэмнэнэллэр.

Александр Жирков, сиэмэ хортуоппуй хаһаайыстыбатын салайааччы: «Быйыл 140-150 туонна сиэмэ хортуоппуй атылыахтаахпыт. Розаро, Ред Скарлетт, Элита уонна бэйэбит Саха сиригэр селекцияламмыт Вармас диэн суортаахпыт».

Хортуоппуйу харайар сирдэригэр сылга 700 туоннаҕа диэри хортуоппуйу батараллар. Маныаха үлэ көдьүүстээх буоларыгар Дьиэ кэргэн ферма граанын үбүнэн ылыллыбыт тустаах обордуованиены туһаналлар. Ол курдук тиэхиникэ көмөтүнэн 3-4 үлэһит күҥҥэ 6 туоннаҕа диэри хортуоппуйу наардыыр кыахтаах.