Өрөспүүбүлүкэҕэ баһаартан сэрэхтээх буолуу балаһыанньата салҕанар

Иниспиэктэрдэр баһаартан сэрэхтээх буолуу ирдэбилэ бу дьиэ подъеһыгар төрдүттэн тутуһулуллубатаҕын көрөн дьиксинэллэр. Боруобаттара быстан, уоттан арахсан тураллар.

Маннык түгэҥҥэ ирдэбил салайар хампаанньаттан. Бэрэбиэркэлээччилэр  быһаччы эппиэттээх тэрилтэҕэ тахсыахтара. Уот  кутталын туоратыыга бу күннэргэ үлэ хас да бүк күүһүрдэ.

Евгений Габышев, СӨ ЫБММ Дьокуускайдааҕы хонтуруоллуур уонна сэрэтэр үлэ салаатын салайааччы: “Баһаарынай тиһик үлжэлиир дуу суох дуу диэн көрөбүт. Ону таһынан таһырдьа тахсар ааннар хатаныа суохтаахтарын, этээстэртэн түһэр кирилиэстэргэ мал-сал суоҕун бэрэбиэркэлиибит. Этиллибит кэһиилэри буллахпытына өрөспүүбүлүкэ Борокуратууратын кытта сүбэлэһэн дьиэни салайар хампаанньаҕа бэрэбиэркэ ыытабыт”.

Сыл саҕаланыаҕыттан 14 киһи уокка былдьанна. Ол иһигэр тоҕус оҕо. Онон  Саха сиригэр баһаартан сэрэхтээх буолуу балаһыанньата өрөспүүбүлүкэҕэ биллэриллэн турар. Билигин тахсыбыт баһаардар төрүөттэрин чопчулааһын үлэтэ барар.

Александр Насыров, СӨ ЫББМ хонтуруол уонна сэрэтии салалтатын хонтуруоллуур салаатын инженерэ: “Нам, Сунтаар уонна Ньурба улуустарыгар буолбут баһаардарга АДПИ суох этэ. Ньурбаҕа буолбукка баар эрээри үлэлээбэтэх. Билигин ону бһыраарыы үлэтэ барар”.  

Хас биирдии  баһаар бу лабораторияҕа чинчийиллэр, уот туруутун төрүөтэ манна быһаарыллар. Бу аҕыйах хонуктааҕыта уокка былдьаммыт чааһынай дьиэни боруобаттарын сыныйан көрөллөр, итини сэргэ уматык сытыгар бэрэбиэркэлииллэр.

Мария Дмитриева, корреспондент: “Бу лабораторияҕа химическэй чинчийии барар. Ол курдук соруйан уоттааһын барбыт дуу суох дуу диэн быһаараллар. Хас да түһүмэхтээх чинчийии ыытыллар. Холобур, бастакы түһүмэх уматык сытын баһаарыы”.  

Оттон статистика көрдөрөрүнэн олорор дьиэлэргэ баһаар сүрүн төрүөтэ электричество, бырыһыан 80 тэҥнэһэр. Онон бу лаборатория үлэтэ ордук элбэх.

Анатолий Постников, СӨ Холоон көрөр баһаарынай лабораториятын чинчийии уонна холоон көрүү салаатын салайааччы: “Бу лабораторияҕа баһаартан ылыллыбыт боруобаттары, араас электрическэй тэриллэри үөрэтэн көрөбүт уонна туох кэһиллии тахсыбытын быһаарабыт”.  

Онон уот ситимин тардыыга, прибордары туһаныыга эппиэтинэстээхтик сыһаннаһыыны ыҥырыллар. Итини сэргэ хас биирдии дьиэҕэ буруо сытын биллэрэр тэрили туруорарга сүбэлииллэр.