Никита Хабаров - “Хаҥалас Хапсаҕайа” күрэх муҥутуур кыайыылааҕа

Өбүгэ саҕаттан кэлбит саха төрүт күрэһэ - хапсаҕай "Өрөгөй" спорт киинигэр.  "Хаҥалас Хапсаҕайа" аан дойду таһымын ылан 2-ис түһүлгэтин тэрийдэ. Быйыл Гран-при кыттар бөҕөстөрүн ахсаана да, ыыра да кэҥээтэ. Уопсайа 400-тан тахса кыттааччы илин-кэлин түһүстүлэр.

Үгэскэ кубулуйан күрэх 2 күн устата ыытылынна. Бастакы күн 85 киилэттэн 95-тэн үөһэ уонна бэтэрээннэр кииристилэр. 3 төгүлүн "Хаҥалас Хапсаҕайыгар" кытта сылдьар Никита Софронов олох бүтэһик сөкүүндэҕэ финалга тахсары ситиһэр. Ярыгин турнирын кэнниттэн тутатына манна кытта сылдьар.

Никита Софронов,күрэх кыттыылааҕа: "Бүтэһик сөкүүндэҕэ Максимовы кыайдым. Ыарахан киирсии буолла, хата кыайдыбыт".

Төрүт көрүҥмүт хапсаҕайы сэҥээрии сылтан сыл үрдээн иһэр. Быйыл тоҕус судаарыстыбаттан уонна аҕыс Россия регионнарын бөҕөстөрө кыттыыны ыллылар. Манна төһүү 2024 сыллаахха тэриллибит хапсаҕай аан дойдутааҕы федерацията буолар.

Вячеслав Нестеров, күрэҕи тэрийээччи: "Международнай федерация 2024 сылтан үлэтин саҕалаан, бу төрдүс улахан күрэхтэһиитэ буолар. Ааспыт сылга Кыргызстаҥҥа тэрийбиппит. Эмиэ былырыын атырдьах ыйыгар дойду таһымнаах күрэһи ыыппыппыт".

Быйыл Бурятиялар  халыҥ хамаанданы аҕалбыттар. Тустаах өрөспүүбүлүкэ тумус туттар уоллара, элбэҕи эрэннэрэр бөҕөстөрө Зоргито Ухинов былырыын "Хаҥалас Хапсаҕайын" кыайыылаҕынан буолбута, быйыл боруонса мэтээли ылары ситистэ.

Зоригто Ухинов, күрэх боруонса мэтээлин хаһаайына (Бурятия):"Боруонса эмиэ үчүгэй көрдөрүү. Саха сиригэр хапсаҕайы, тустууну олус өрө туталлар. Мин ону олус сөбүлүүбүн. Улахан махтал барыгытыгар өйөбүлгүт, ыһыыгыт-хаһыыгыт иһин".

85 киилэ ыйааһыҥҥа муҥуутуур кыайыылаҕынан, Кыргызстаантан кытта сылдьар аатырбыт Арасалан Будажапов буолла. Хапсаҕайга күүстээх утарсааччыларын кэннигэр хаалларан кыайыы үктэлигэр таҕыста.

Арасалан Будажапов, 85 киилэҕэ кыһыл көмүс мэтээл хаһаайына (Кыргызстан): "Көрөөччү өйөбүлүттэн бөҕөстөр олус астынабыт. Бу күрэх өссө сайдарыгар баҕарабын. Олус элбэх күрэхтэһээччи араас дойдуттан кэлбит".

Тыҥааһыннаах киирсии түмүктэринэн, быйылгы "Хаҥалас Хапсаҕайын" муҥуутуур кыайылааҕынан Никита Хабаров - Муома Хайата буолла. Үгэскэ кубулуйан кыайыылаахха алмаас таастаах мэтээл, кур, үрүҥ көмүс батыйа уонна 200 000 солкуобай харчынан бириэмийэлэннэ.