Бу сылга саҥа уларыйыылар

Саҥа сыл уларыйыыларын хамнас алын кээмэйин үрдээһиниттэн саҕалыам. Ол курдук бу ыйтан 20% улаатан, дойдуга 27 093 солкуобайга тэҥнэстэ. Оттон Саха сиригэр 1,7 оройуон коэффициеннаах улуустарга 67 733 солкуобай, оттон хоту улуустарга 75 861солкуобайга диэри улаатта.

Ыйдааҕы тиийинэн олоруу алын кээмэй улаатта.

2026 сылга тиийинэн олоруу алын кээмэйэ маннык буолуо:

орто кээмэй  — 18 939 солк. (17 733 солк. оннугар);

үлэлиир кыахтаах дьоҥҥо — 20 644 солк. (19 329 солк. оннугар);

оҕолорго — 18 371 солк. (17 201 солк. оннугар);

биэнсийэлээхтэргэ — 16 288 солк. (15 250 солк. оннугар).

Бу сылтан биир кэлим пособиены анааһын бэрээдэгэ кытаатта.

2026 сыл тохсунньу 1 күнүттэн ыал биир кэлим босуобуйаны анатыыга ирдэнэр дохуот алын кээмэйэ үрдээтэ. Өскөтүн 2025 сылга дьиэ кэргэн хас биирдии үлэлиир чилиэнигэр 89 760 солк. (4 хамнас алын кээмэйэ 4 х 22 440 солк.) эбит буоллаҕына, тохсунньу бырааһынньыктарын кэннэ дохуот алын кээмэйэ 216 744 солк. (8 хамнас алын кээмэйэ = 8 х 27 093 солк.) диэри улаатар. Манна киһи сөптөөх биричиинэнэн үлэлээбэтэх эбэтэр үлэтэ суох быһыытынан официальнайдык учуоттаммыт кэмнэрэ аахсыллыбаттар. Больничнай харчыта, биэнсийэ уонна атын социальнай төлөбүрдэр биир кэлим босуобуйаны аныырга дохуот быһыытынан ааҕыллаллар.

Бэйэ дьарыктаахтарга больничнай харчытын төлүөхтэрэ.

2026 сылтан бэйэ дьарыктаахтар — самозанятайдар мэдиссиинэ страховкатыгар баҕа өттүнэн взнос төлүүр кыахтаныахтара. Саҥа сокуонунан гражданин страховка кээмэйин талар бырааптаах — 35 эбэтэр 50 тыһыынча солкуобай уонна онтон 3,84% (ый аайы 1 344 солк. эбэтэр 1 920 солк.) төлүүр. Больничнай харчытын ылар быраап алта ый тохтоло суох төлөөбүт эрэ кэннэ үөскүүр.

Оҕолоох ыалларга нолуок кэшбэгэ бэлэмнэннэ

2026 сыл тохсунньутуттан икки уонна онтон элбэх оҕолоох ыалларга дохуот нолуогун сороҕун төнүннэрэр сокуон үлэлиэҕэ.

 Кэшбэги ыларга ирдэбиллэр:

-төрөппүттэр иккиэн 13% ыстаапкалаах НДФЛ төлөнөр дохуоттаах буолуохтаахтар;

-дохуот дьиэ кэргэн хас биирдии чилиэнигэр аахтахха, регионнааҕы тиийинэн олоруу алын кээмэйин 1,5 төгүлүн куоһарыа суохтаах;

төрөппүттэр иэстэрэ суох буолуохтаах;

-оҕолор саастара 18 диэри, эбэтэр, өскөтүн оҕо идэлээх уонна үрдүк үөрэххэ күнүскү салааҕа (очная форма) үөрэнэр буоллаҕына, 23 сааһыгар диэри.

-Кэшбэги ыларга бэс ыйын 1 күнүттэн алтынньы 1 күнүгэр диэри Социальнай пуондаҕа сайабылыанньа биэриэххэ наада. Кэшбэк кээмэйэ киһи аайы тус-туһунан: ол 13% ставкаттан  нолуок төлөммүт дохуоттан 7%-на буолар.