Саха сиригэр кыстык ортото

2023 сыллаахха Болугур нэһилиэгин олохтооҕо Алексей Максимов сыспай сиэллээҕинэн дьарыктанарга сананан хаһаайыстыба арыммыта. Дэриэбинэттэн 10-ча көс тэйиччи сылгы баазатын туттан үлэлии-хамсыы сылдьар. Кыра нэһилиэккэ үлэ миэстэтин таһааран билигин кини 10 киһини сылгыга сыһыаран үлэлэтэр. Кыс оройун этэҥҥэ туораатыбыт диэн санаатын үллэстэр.

Алексей Максимов, сылгыһыт: «Кыстык этэҥҥэ баран иһэр, үчүгэй. Сылгылар туруктара үчүгэй. Отучча төбөлөөхпүн. Быйыл 400 рулон от оҥорбуппут. Кыстыыр оппут баар».

Амма улууһугар быйыл тыа хаһаайыстыбатын сыла биллэриллэн турар. Онон бу хайысхаҕа үгүс үлэ барыахтаах - сүрүн болҕомто пиэрмэрдэргэ ууруллуоҕа. Чуолаан тэриллиилээх хаһаайыстыбаларга.

Степан Кузьмин, Амма улууһун баһылыга: «Сыспай сиэллээхпит 16 тыһ. кэриҥэ баар. Тыа хаһаайыстыба сылыгар биһиги сири таҥастааһыҥҥа улахан болҕомтону уурабыт. Тиэхиньикэ ылааһына буоллун, төбө ахсаанын элбэтигэ, оҥорон таһаарар бородуксуйаны элбэтэргэ болҕомто уурабыт».

Онтон билигин Өрөспүүбүлүкэҕэ кыстык түмүктэнэрэ 80 хонук хаалла диэн тыа хаһаайыстыбатын министиэристибэтэ иһитиннэрэр. Бүгүҥҥү күн туругунан 164 тыһынча сылгы, онтон 112 тыһынчата биэ  кыһыны этэҥҥэ туоруу тураллар.

Александра Петрова, ТХМ сүөһү иитиитигэр департаменын сүрүннүүр исписэлииһэ: «35573 сылгы эбиэскэ киирэн турар. Уопсай сылгы ахсааныттан 21,7%. Оппут саппааһа Өрөспүүбүлүкэ үрдүнэн 78,6%, сиилэспит 54,4%, сенажпыт 38%. Күн-бүгүн Өрөспүүбүлүкэ үрдүнэн ветеринария управленията этэринэн, былаанынан быһыы бара турар».

Сылгыга төрүөх кэмэ эмиэ кыралаан саҕаланан эрэр. Билигин 10 биэ төрүөх биэрдэ, былырыын баччаларга 7 этэ.