Тыа сиригэр оҕо уһуйаана нэһилиэк сайдыытыгар төһүү күүс буолар

Татьяна Баишева саамай кырачаан дьону кытары үлэлэһэр иитээччи буолар. Кини "Төрүөҕүттэн оскуолаҕа диэри" уонна "Тосхол", "Үрүйэчээн" бырагыраамаларынан иитиллээччилэрин кэрэҕэ-сырдыкка тардар. Маныаха кэллэктиибинэн оҕолор улааталларыгар бары өттүнэн сайдыылаах буолалларыгар туһуламмыт оҕо толкуйун, өйүн сайыннарар матырыйаалларын  бэйэбит илиибитинэн оҥоробут диэн кэпсиир.

Татьяна Баишева, "Мичээр"  оҕо уһуйаанын иитээччитэ: «Көрдөрөн үөрэтэбит. Дидактическай матырыйаал курдук. Бу хаар эбэ баар, тыыраахы баар. Үрүҥ эһэни оҕолор номнуо билэллэр. Дьүкээбил диэн тугун эмиэ билэллэр».

История кэрэһэлииринэн Тааһаҕарга 1956 сыллаахха бастакы сопхуос үлэһиттэрин оҕолоругар анаммыт 20 миэстэлээх дьааһыла арыллыбыт. Ол кэмтэн саҕалаан үлэ тигинэччи барбыт. Манна үлэтигэр олус бэриниилээх, 40 сылын оҕо иитиитигэр анаабыт Наталья Семенова олохтон хаалбакка араас тосхоллору тутуһан үлэлиибит диэн иһитиннэрэр.

Наталья Семёнова, "Мичээр"  оҕо уһуйаанын сэбиэдиссэйэ, СӨ үөрэҕириитин туйгуна: «Эркээйи эргиирэ диэн региональнай инновационнай былаһааккаҕа кытта сылдьабыт, оскуолабытын кытта. Аныгы олох ирдэбилинэн уһуйаан уонна оскуола оҕолору иитэр, үөрэтэр биир эйгэ диэн бырагырааманан үлэлээн олоробут».

Этнопедагогика ньымаларын тутуһан, чахчы уһуйааҥҥа бүтүн биир хос олоҥхо эйгэтигэр, төрүт оонньууларбытыгар анаммыт. Манна нэдиэлэҕэ хас да күн араас дьарыктар ааһаллар.

Төһө да уһууйаан дьиэтэ эргэрдэр, үлэһиттэр бэйэлэрин күүстэринэн, дууһаларын ууран туран оҕо саадын тупсараллар. Ол да иһин буолуо мичээрдэр Өрөрспүүбүлүкэ таһымыгар бастыҥнарынан ааҕыллыбыттара. Манна өссө саамай төһүү төрөппүттэри кытары биир сомоҕо буолан үлэлэһии.

Лариса Осипова, “Мичээр” оҕо уһуйаанын сүрүн иитээччитэ: «Төрөппүттэрбит биһиэхэ көмөлөһөллөр. Ону-маны оҥоруу буоллаҕына, дьарыктарга. Тыа сиригэр олороллорун быһыытынан оҕолор сахалыы тылга уонна саха олоҕор ордук сыһыаннаахтар».

Бу курдук оҕолору кыра эрдэхтэн төрөөбүт дойдуга тапталы, бэриниилээх буолууну, төрүт үгэстэрбитин билиигэ мичээрдэр туох баар күүстэрин ууран туран үлэлии сылдьаллар.