Саха сирин норуоттарын муусукатын уонна фольклорун түмэлэ оҕолорго анал бырагырааманы бэлэмнээтэ

Саха сирин норуоттарын муусукатын уонна фольклорун түмэлэ оҕолор каникулларын туһалаахтык атааралларыгар киэн бырагырааманы бэлэмнээн олорор. Оҕолор түмэлгэ историяны кэпсиир экспонаттары, киинэлэри, ойуулуктары көрөллөрүн таһынан, мусукаалынай үнүстүрүмүөннэргэ оонньоон, тутан-хабан бэйэлэрин холонон көрүөхтэрин сөп.

Алевтина Николаева, СӨ муусука уонна фольклор түмэлин үлэһитэ: «Чуолан муусука үнүстүрүмүөннэрин сөбүлээн көрөллөр. Тутан-хабан көрөллөр, быдан тиийимтиэ буолар».

Маны таһынан түмэл үлэһиттэрэ олохтоохторго, ыалдьыттарга араас тэрээһиннэри, маастар-кылаастары ыыталлар. Манна Саха төрүт култууратын хайысхатыгар оҕолортоон саҕалаан улахан дьоҥҥо тиийэ кэлэн дьарыктаналлар.

Алевтина Николаева, СӨ муусука уонна фольклор түмэлин үлэһитэ: «Биһиэхэ өссө остуол оонньуулара бааллар: хабылык, хаамыска. Уонна бүтэһигэр оһуохайынан түмүктээччибит. Оҕолорго саха буоларбыт быһыытын кинилэргэ ону иҥэрэ уонна билиһиннэрэ диэн буолар».

Саха сирин норуоттарын муусукатын уонна фольклорун түмэлин үлэтэ киэн далааһыннаах, улахан суолталаах. Олохтоох омуктар ырыаларын-тойуктарын сөргүтэн, үйэтитэн кинигэлэри таһааттарар. Быйыл түмэл хас да үбүлүөйдээх тэрээһинээх, сыл устата элбэх үлэ ыытыллынна. Култуура эйгэтигэр сүҥкэн кылааты киллэрсибит Февронья Баишева 100 сыла, Александр Самсонов 90 уонна Аиза Решетникова 80 үбүлүөйдээх сыллара. Онон кинилэр олохторун, айар үлэлэрин кэпсиир анал быыстапкалар турдулар, киинэлэр таҕыстылар.

Мария Корнилова, СӨ муусука уонна фольклор түмэлин дириэктэрэ: «Бу дьоннорбутун ааттарын үйэтитэргэ киинэ оҥорбуппут. Күннэтэ түмэлбитигэр оҕолор, улахан дьоннор бу киинэни көрөн бараллар. Бу дьон олоҕун, үлэлээн-хамнаан кэлбит үлэлэрин көрдөрөр киинэ буолар».

Быыстапкалар бу сыл бүтүөр диэри көрдөрүүгэ туруохтара. Онон түмэл аана куруук аһаҕас олохтоохтору, ыалдьыттары күүтэр.