​​​​​​​Дьокуускайга удамыр сыаналаах куортамҥа саҥа дьиэ тутуллан киириэхтээх

Хас этээс аайы үлэ тигинэччи барар. Бүтэһик кыбартыыларга истиэнэ кырааскаланар. Бырайыак быһыытынан өҥө сырдык. Манна уопсайа 141 кыбартыыра баар. Балар бары биир тииптээх буолуохтара. Итиэннэ сотору кэминэн  удамыр сыанаҕа куортамнааччылар олоро киириэхтэрэ. Бу дьиэ Уһук Илин уокуругар саҥа бырагыраама чэрчитинэн тутулунна.  

Валентина Алексеева, СӨ олох-дьаһах бырагыраамаларын сайдыытын киинин куортам пуондатын салаатын сүрүннүүр исписэлииһэ: «Саха Өрөспүүбүлүкэтигэр былырыыҥҥаттан үлэлиир бырагыраама буолар. Уопсайынан Саха сиригэр 4 куоракка 1003 кыбартыыра лимит бэриллибитэ. Дьокуускайга, Нүөрүҥгүрүгэ, Алдаҥҥа уонна Мииринэйгэ буолар. Бу судаарыстыбыннай өйөбүл дьаһыла Уһук Илин урутаан сайдарыгар, олоххо наадалаах, үлэҕэ табыгастаах усулуобуйаны оҥорор сыаллаах соруктаах буолар».

Оттон бу номнуо толору бүппүт кыбартыыралар. Дьиэ иһэ сып-сылаас, сып-сырдык. Миэбэлэ, тиэхиникэтэ турбут. Куукуна ыскааба таҥыллан бэлэм, гаас оһохтоох, холодильниктаах. Икки миэстэлээх оронноох, дьыбааннаах итиэннэ таҥас уурар ыскааптардаах. Уопсайынан киһи наадыйара барыта баар.

Ол эбэтэр куортамнааччылар ырыынак сыаныттан үс гыммыт биирин эрэ төлүүллэр. Маны таһынан ыйдааҕы хомунаалынай төлөбүрдэрин олохтоохтор бэйэлэрэ уйуналлар. Үөһэ этиллибитин курдук бу бырагыраама олоххо уонна үлэҕэ табыгастаах усулуобуйаны тэрийэр сыаллаах. Онон чэпчэтиилээх куортамы нэһилиэнньэ кэккэ араҥата туһанар бырааптаах.

Мария Алексеева, СӨ олох-дьаһах бырагыраамаларын сайдыытын киинин дириэктэрэ: «Билигин биһи бу дьиэни киллэрээрибит дьоннортон сайабылыанньа ыла турабыт. Ол курдук СВО кыттыылаахтара, кинилэр дьиэ кэргэттэрэ, эдэр исписэлиистэр 35 саастарыгар дылы, эбэтэр атын регионнартан кэлбит исписэлиистэр кыттыахтарын сөп. Бу күннээххэ номнуо 350 тахса сайабылыанньа киирбитэ. Сайабылыанньалары алтынньы 31 күнүгэр дылы ылабыт. Онон, кэлэн кыттыаххытын сөп».

Дуогабары 3 сылга түһэрсиэхтэрэ. Сыл аайы дьиэтэ суохтарын оччуоттуур ирдэнэр. Чэпчэтиилээх куортамҥа уһаабыта 5 сыл олоруохха сөп. "Билибино" диэн саҥа дьиэҕэ сэтинньи бүтүүтэ куортамнааччылар толору киириэхтэрэ. Онон ый кэриҥинэн манна олох күөстүү оргуйуо. Итини сэргэ Дьокуускай куоракка эһиил өссө куортам кыбартыылара үлэҕэ киириэхтэрэ. Уопсайа 450 кыбартыыра баар буолуо.