Сһа өрөспүүбүлүкэтин төрүт сокуонугар уларытыылары уонна көннөрүүлэри ылыннылар

Саха өрөспүүбүлүкэтин төрүт сокуонугар уларытыыны уонна көннөрүүнү киллэрии 6 ыстатыйаны хабар. Норуот депутаттара бигэргэтиэхтэрин иннинэ уопсастыбаннас, былаас өттүттэн үгүс дьүүллэһии барда. Ол кэннэ бүтэһиктээх эридьиэстээһин пленарнай мунньахха ыытылынна.Бу кэннэ куоластааһын түмүгүнэн бүтэһиктээх ааҕыынан төрүт сокуон барылын ылыннылар. 

Сергей Сивцев, норуот депутата: "Бастакы боппуруоһунан көрүллүбүт төрүт сокуоҥҥа уларыйыылара ылылыннылар. Манна 55 депутат сөбүлэҥин биэрдэ. Быыбар чааһыгар этэр эбит буоллахха, бу саҥа федеральнай 33 сокуонунан улуустар икки таһымнаах былааска хаалар буоллулар. Ол курдук нэһилиэк баһылыктара талыллыахтара уонна улуус баһылыктара депутаттар бигэргэтиилэринэн салгыы үлэлиир буолуохтара".

Үгүс дьүүллэһиини уонна дьаарханыыны үөрэхтээһиҥҥэ сыһыаннаах уларытыы тардыбыта. Саха сирин төрүт сокуонун 22 ыстатыйатыйатыгар чопчулааһын кэннэ билигин оҕо 9 кылаас кэннэ талар бырааптанна.   

Ньургуна Соколова, СӨ үөрэх уонна наука миниистирэ: "Нэһилиэнньэҕэ, уопсастыбаннаска долгутуулар баалларын быһааран туран куоластааһын буолла. Инньэ гынан 10-11 кылаастарга үөрэнии босхо, 9 кылаас кэннэ төрөппүт уонна үөрэнээччи быһаарыытынан колледжка үөрэнэ барыахтарын сөп. Ону тэҥэ депутаттары долгуппут аҕыйах ахсааннаах оскуолаларбыт, көс оскуолалар бары оннунан хаалаллар". 

Маны тэҥэ 72 ыстытыйаҕа уларытыылар киирдилэр, манна олоҕуран, Саха сирин Ил Дархана көмүс уонна күндү таас судаарыстыбаннай пуонда баайын-дуолун харайыыны, тэрийиини уонна туһаныыны хааччыйар, ону тэҥэ пуондаттан батарыыга быһарыныылары ылынар боломуочуйаланна.

Алексей Еремеев, Ил Түмэн Бэрэссэдээтэлэ: "Хас грамм көмүс, хас карат бриллиант атыыламмыта дуу атыылаһыллыбыта дуу бюджет сокуонугар бүтүннүү көстө сылдьар буолуоҕа. Инньэ гынан дьон-сэргэ барытын билэ сылдьар буолуоҕа. Бу ордук демократическай уонна дьон-сэргэ билэригэр сөптөөх нуорма киирдэ диэн диэн биллэрэбин". 

Олохтоох бэйэни салайыныы сокуонугар төнүннэххэ. Аны мантан салгыы боломуочуйалары тыырыахтара. Сокуон барыла оҥоһулунна. Сэтинньи ыйга бастакы ааҕыытын норуот депутаттара көрүөхтэрэ. Онтон ахсынньыга нэһилиэнньэни, олохтоох былааһы кытта дьүүллэһии кэннэ ахсынньыга уочарата суох мунньахха бүтэһиктээх ылыныыны бигэргэтиэхтэрэ.