Саха сирин баһаары утары сулууспата "Саҥа дьыл" профилактическай аахсыйатын саҕалаата

136 баһаар уоту сэрэҕэ суох туттууттан, 111 уот туруута электрическай ситими сыыһа туттааһыныттан уот бу сылга тахсыбыт диэн статистика хобдох сыыппарата көрдөрөр. Билигин Өрөспүүбүлүкэ үрдүнэн "Саҥа дьыл" профилактическай тэрээһин саҕаланан, баһаарынай инструктордар дьиэлэринэн сылдьан сэрэтэр үлэни ыыталлар.

Антонина Ущницкая, СӨ баһаары утары сулууспатын пресс-сулууспатын үлэһитэ: «Маассабай тэрээһиннэр буолар сирдэригэр рейдэлэр ыытыллаллар. Халлаан тымныйан жилой сектордарга сүрүннээн баһаар тахсар. Ону сэрэтэр сыаллаах рейдэлэр ыытыллаллар».

Тустаах  үлэ чэрчитинэн бу сылга 237 тыһ  тахса киһи уоттан сэрэхтээх буолууга иһитиннэриилэри иһиттэ. 8000 кэриҥэ дьарыктар, лекциялар буолан аастылар. Улахан профилактическай "Гараж", "Быт", "Саҥа дьыл" диэн тэрээһиннэр ыытыллаллар. Сэрэтии үлэтигэр киэҥ далааһыннаах дьайыы баран, баһаар көрдөрүүтэ намтаабыта бэлиэтэнэр.

Вадим Васильев, СӨ баһаары утары сулууспатын профилактика салаатын быстах кэмҥэ салайааччытын солбуйааччы: «Сыл саҕаланыаҕыттан Өрөспүүбүлүкэ үрдүнэн 1735 баһаар бэлиэтэннэ. Ааспыт сылы кытта тэҥнээн көрдөххө 1788 баһаар буолбут. Баһаар сүрүн төрүөтэ – аһаҕас уоту сэрэҕэ суох туттуу, электрическэй прибордары сэрэҕэ суох сыыһа туттуу, оттуллар оһоҕу көрүүтэ-истиитэ суох хаалларыы буолар».

Антонина Ущницкая, СӨ баһаары утары сулууспатын пресс-сулууспатын үлэһитэ: «Сыл саҕаланыаҕыттан “Баһаары сэрэт - АДПИ туруор” диэн аахсыйа чэрчитинэн уопсайа 3690 АДПИ ыалларга турда».

Маны кытары тэҥҥэ АДПИ - буруо бастакы сөкүүндэлэрин сэрэтэр оборуудабаньаны туруоруу үлэтэ тиһигэ быһыллыбакка бара турар. Бастакы уочарат элбэх оҕолоох ыалга, бэтэрээнэргэ, доруобуйатын туругунан хааччахтаах дьонноох ыалга туруорулунна.

Антонина Ущницкая, СӨ баһаары утары сулууспатын пресс-сулууспатын үлэһитэ: «Бу ый 10 күнүттэн “Саҥа дьыл” профилактическай операция ыытылла турар. Бу чэрчитинэн холбоһук рейдэлэр ыытыллаллар».

Маныаха билигин баһаары утары сулууспа саҥа дьыллааҕы пиротехниканы, фейерверктары бэрэбиэркэлиир үлэтэ саҕаланыаҕа.