Халтараантан суол быһылаана элбиир

Бу дьуулаан каадырдарга Хаҥалас улууһугар тахсыбыт суол саахалын көрөҕүт.  "Умнас" региональнай таһымнаах аартыгар, Мохсоҕоллоох бөһүөлэгэр 1991 сыллаах олорсо сылдьыбыт эдэр киһи суол саахалын тахсыытыттан суорума суоланна. Барыллаан көрүү түмүгүнэн суоппар киһи суол халтарааныттан  улахан кыамтаалаах "МАН" мааркалаах тимир көлөҕө баран түспүт.

Ирина Ефремова, Суол судаарыстыбаннай иниспиэксийэтин өйдөтөр-сырдатар үлэҕэ салаатын иниспиэктэрэ: “Мохсоҕоллоох аттыгар 92 килэмиэтиргэ Тойота Суксид массыына кыайан уруулун туппакка, суолтан тахсан турар массыынаҕа түһэн, хомойуох иһин, олорсон испит киһи тута суох буолбута, бэйэтэ балыыһаҕа киирбитэ”.

Күн-дьыл уларыйа турар кэмигэр.Түүнүн тымныйар, күнүһүн сылыйар, сөҥүүлээх кэмҥэ тустаах биэдэмистибэ бу хайысхаҕа үлэтин күүһүрдэр. Холобура, Өрөспүүбүлүкэтээҕи суол салалтатын кытары ГАИ иниспиэктэрдэрэ Владимировка бөһүөлэгин аартыгар сэрэтэр-профилактическай үлэтин ыытта. Манна суоппардары кытары суолга куттала суох буолуу айаныгар анаммыт иһитиннэриилэри туттардылар, сэрэтэр кэпсэтиилэри  ыыттылар.

Регион таһымнаах суолларга балаһыанньа маннык эбит буоллаҕына, киин куоракка дьон өлүүлээх суол саахаллара үксүүллэр. Аҥаардас биир ый иһигэр 170 суол быһылаана тахсыбыт, онно үгүс киһи араас таһымнаах эчэйиилэри ылбыттар. Бу соторутааҕыта таһаҕастаах массыына үнтү көтөн, кырдьаҕас киһи олохтон туораата.

Жанна Макарова, Дьокуускайдааҕы суол судаарыстыбаннай иниспиэксийэтин өйдөтөр-сырдатар үлэҕэ салаатын иниспиэктэрэ: “Алтынньы 20 күнүгэр күнүс 16 чаас саҕана суоппар кэннинэн айаннаан иһэн 77 саастаах дьахтары түҥнэри көппүт. Дьахтар эчэйиитэ улахан буолан тута тыына быстыбыт. Бу дьыаланан силиэстийэлиир уорганнар быһаарыы ылыахтара”.

Суол судаарыстабаннай инсипиэксийэтэ күннэтэ айан аартыктарыгар дьуһуурустубалыыр. Суол быраабылатын кэһиитин кытары трассаларга, суолларга куттал суох буолуутун хааччыйар. Ол да буоллар статистика чахчыта хобдох.

Ирина Ефремова, Суол судаарыстыбаннай иниспиэксийэтин өйдөтөр-сырдатар үлэҕэ салаатын иниспиэктэрэ: “Сыл саҕаланыаҕыттан уопсайа 613 суол саахала таҕыста. Манна 782 киһи араас эчэйиини ылла, 69 киһи тыына быһынна”.

Манна даҕатан этэр эбит буоллахха, саахал тахсыытын сүрүн төрүөттэрэ: түргэн оскуораһынан айан, сөптөөх массыына икки ардын тутуспат буолуу уонна биллэн турар, халтараан суол диэн ГАИ иниспиэктэрдэрэ тоһоҕолоон этэллэр.