Эдэрдэргэ бастыыр иһин саха дэгит күрэһигэр бастыҥнар илин-кэлин түсүһэллэр
Главное
-
23 октября в 12:25В Якутии запущен новый продукт по гарантийной поддержке малого и среднего бизнеса
-
23 октября в 11:58Глава Якутии провёл встречу с Афанасием Саввиным
-
23 октября в 11:51В Якутии по квоте трудоустроены 914 участников СВО и членов их семей
-
23 октября в 11:24В Якутии медицинскую реабилитацию прошли 359 участников СВО
Күрэхтэһии батакы күнүн биир тыҥааһыннаах киирсиитэ мас тардыһыы. Манна кэрэ аҥаардарга эмиэ сытыы киирсиилэр. Мэҥэ Хаҥаластан сылдьар Айаана Константинова бу көрүҥҥэ биир бастыҥнар истэригэр баар. Мас тардыһыынан утумнаахтык номнуо 6 сылын дьарыктанар, улахан күрэхтэһиилэр кыттыылаахтара. Оттон бу дэгит күрэскэ бастакы холонуута.
Айаана Константинова, Саха сиригэр эдэрдэргэ бастыыр иһин саха дэгит күрэһин кыттыылааҕа: "Бэйэм мас тардыһыык буоламмыт бэттэх соҕус сылдьабын. Саамай ыарахан тутум уонна сүүрүү дии саныыбын. Кыргыттар бары күүстээхтэр, дьарыктаахтар".
Кэнники сылларга саха төрүт көрүҥнэрэ сайдыбыттара харахха. Аҥардас бу эдэрдэргэ күрэс ону туоһулуур. Саха сирин бары муннугуттан талыллан 22 уолан уонна 7 кыыс илин-кэлин түсүһэллэр.
Василий Протопопов, Саха сиригэр эдэрдэргэ бастыыр иһин саха дэгит күрэһин сүрүн судьуйата: "Бүгүҥҥү күрэхтэһиигэ 13 улуустан 29 кытааччы кэлэ сылдьар. 7 кыыс уонна 22 уол. Бу күрэххэ 18-21 диэри кытталлар. Сыл аайы ыытыллар".
Күрэскэ ордук элбэх кыттааччы биллэн турар өрөспүүбүлүкэбит саамай элбэх нэһилиэнньэлээх улууһуттан Мэҥэ Хаҥаластан. Маны тэҥэ Кэбээйи оройуонуттан үгүстэр. Эмис соботунан биллэр улууска саха дэгит күрэһигэр күүстээх боотурдар уутуйан үөскээбит сирдэрэ. Манна бу спорт төрүт көрүҥнэригэр бэйэтэ туспа албастаах оскуоланы уолаттар ааһаллар. Билигин эдэрдэргэ биир чаҕылхай боотур Артем Дьяконов.
Артём Дьяконов, Саха сиригэр эдэрдэргэ бастыыр иһин саха дэгит күрэһин кыттыылааҕа: "Устудьуоннуу кэлиэхпиттэн бу күрэххэ кыттабын. Быйыл бүтэһик сырыым, онон хайаан да кыттыахтаахпын диэн кытынным. Быйыл балаҕан ыйыттан күүстээх бэлэмнэниибин саҕалаатым".
Оттон бу күрэстэн кынаттанан элбэх биллэр-көстөр боотурдар тахсыбыттара. Онтон биир саамай муҥутуур чыпчаалынан Дыгын оонньуулара буолар. Манна кыттааччылар бары бастакы ситиһиилэрэ бу эдэрдэргэ бастыыр иһин күрэс этэ.
Алексей Уваровский, "Дыгын оонньуулара - 2022" кыайыылааҕа: "Бу күрэхтэһиини кыайа сылдьыбытым. Эдэрдэргэ бу улахан хардыы уонна кыайыы буолар. Дэгит күрэһинэн билигин элбэх уол дьарыктанар “Дыгын оонньууларыгар” кыттаары. Ол үөрдэр".
Онон саха дэгит күрэһэ сылтан сыл сайдан эрэ иһэр. Саҥа ааттар, инники эрэллэр бу күрэстэн тахсаллар. Оттон бүгүн күрэс иккис күнэ, спортсменнар 4 көрүҥҥэ киирсиэхтэрэ. Уонна кыайыылаахтар ааттара биллиэҕэ.