Балаҕан ыйын маҥнайгы күнүгэр Саха сиригэр икки саҥа оскуола арыллыаҕа

Саҥа оскуола киэҥиттэн уонна тупсаҕай оҥоһуулааҕыттан киһи эрэ сөҕө махтайар. 990 оҕо үөрэнэригэр анаан тутуллубут үөрэх тэрилтэтэ өрөспүүбүлүкэҕэ саамай улахан.  8 кылаас үөрэнээччитэ Сияна Петрова быйылгы үөрэх дьылыгар бу саҥа оскуолаҕа үөрэниэҕэ.

Сааскылаана Петрова, төрөппүт: «Төрөппүт быһыытынан кэргэммин кытта бу Михаил Ефимович Николаев оскуолата үчүгэй буолуо диэн эрдэттэн сэрэйэр этим. Иннэ дии саныыбыт даҕаны».

Бастакы Президент Михаил Николаев аатынан оскуола Дьокуускайга  бастакынан биир симиэнэн үөрэхтээһини киллэриэ.  Саҥа үөрэх кыһата байыаннай итиэннэ дойдуга бэринилээх буолуу хайысхатынан үлэлиэ. Итиэннэ, биллэн турар, Михаил Николаев аатын үйэтитиигэ улахан болҕомто ууруллуо.

Галина Васильева, М.Е. Николаев аатынан 40№-дээх оскуола дириэктэрэ: «Чугастык алтыһан биһиги үлэлиэхпит Хаҥаласка баар Николаев киинин кытары. Кинилэр биһиги үөрэхтээһиммит философиятын оҥоруутугар сүрдээҕин көмөлөһөллөр».

Балаҕан ыйын маҥнайгы күнүгэр Саха сиригэр икки саҥа оскуола үлэҕэ киириэ. Маны тэҥэ үгүс оскуола хапытаалынай өрөмүөн кэннэ арыллыа. Өрөспүүбүлүкэтээҕи анал оскуола-интэринээккэ бастакытын төрдүттэн саҥардыы барда. Ол курдук ититии систиэмэтэ, истиэнэлэр, муоста барыта уларыйда. Билигин үлэ 80 бырыһыана туолан турар.

Лидия Платонова, Өрөспүүбүлүкэтээҕи анал оскуола-интэринээт дефектолог исписэлииһэ: «Биһиги оскуолабыт бу үлэлии кэлбиппэр наһаа үчүгэйдик көрүстэ, сырдаабыт, барыта сабыс саҥа. Кэлэр үөрэх дьылыгар биһи оҕолорбутугар улахан бэлэх».

Оскуоланы тэҥэ интэринээккэ эмиэ саҥардыы барда. Өрөмүөн "Молодежь и дети" диэн федерельанй бырыгараама чэрчитинэн ыытыллар.

Оттон өрөспүүбүлүкэ үрдүнэн быйыл уопсайа 18 оскуола төрдүттэн өрөмүөннэнэр. Мантан 8 сыллаах бырыгараамаҕа хапсан эһиил түмүктэниэхтэрэ.

Степан Степанов, СӨ үөрэх уонна наука миниистирин солбуйааччы: «Муниципальнай оройуоннар бэйэлэрин бүдьүөттэринэн эмиэ өрөмүөн ыыта тураллар. Биһиги министиэристибэбититтэн оробуочай бөлөхтэр айаннаатылар улуустарынан оскуолалар бэлэмнэрин көрөөрүлэр».

Оттон сыл бу үөрэх дьылыгар  өссө 5 оскуола үлэҕэ киириэҕэ.