Дьокуускайга "Күүтүүлээх күндү таҥалай сон" диэн ураты быыстапка арылынна

Саха норуотун үгэһин кэпсиир, дьахтар 18-с-20-с үйэлэргэ кэтэ сылдьыбыт таҥаһын-сабын көрдөрөр ураты быыстапка Саха сиригэр аан бастакытын турда. Археологическай хаһыылартан көстүбүт булумньулар пуондаҕа харалла сытар буолан, барытын хомуйан көрдөрүүгэ таһаарар үгүс ыараххаттардаах диэн тэрийээччилэр кэпсииллэр.

Светлана Петрова, М.К. Аммосов аатынан ХИФУ доцена, историческай билим кандидата: «Харайаллара ыарахан буолан мээнэ таһаарбаттар. Билигин көрдөрүллэр матырыйааллар, холобур саха-французкай экспедиция киэнэ, Константинов, уонна Сэһэн Боло булууларыттан көстө иликтэр».

Быыстапкаҕа хас биирдии сэдэх экспонат сиһилии ойууламмыт, уруһуйдаммыт. Ол курдук бу, 2018 сыллаахха Хаҥалас улууһуттан булуллубут 18 үйэтээҕи дьахтар былыргы таҥаһа-саба, симэҕэ көрдөрүүгэ турда.

Светлана Петрова, М.К. Аммосов аатынан ХИФУ доцена, историческай билим кандидата: «60 саастаах дьахтар көмүүтүттэн булуллубута. Биллэн туран баай, бүтүннүү оҕуруо киэргэллэрдээх».

Быыстапкаҕа хас да түмэлтэн, барыта 200-тэн тахса экспонат хомуллан турда. Маны таһынан норуот маастардара былыргыны үтүгүннэрэн, сөргүппүт үлэлэрэ эмиэ көрдөрүүгэ турдулар.

Александра Прокопьева, Гуманитарнай чинчийии уонна аҕыйах ахсааннаах хотугу омуктар кыһалҕаларын институтун научнай үлэһитэ, археолог: «Үчүгэй туруктаах таҥас көстөрө наһаа сэдэх буолар. Хас да үйэ ааспытын иһин үчүгэй туруктаах кэллэҕинэ саҥаттан саҥа көлүөнэ чинчийээччилэр, иистэнньэҥнэр син биир интириэстэрин тарда туруо диэн итэҕэйэбин».

Быыстапка муус устар 7 күнүгэр диэри көрдөрүүгэ туруоҕа, ол чэрчитинэн төгүрүк остуоллар, сахалыы түүлээх таҥаһы тигэргэ маастар-кылаастар ыытыллыахтара.  Маны таһынан 18 үйэтээҕи Болугур Айыытын көмүүтүттэн булуллбут сиэҕэ суох сону сөргүтүүнү көрдөрүөхтэрэ.