Боло Уус айар үлэтин быыстапката арылынна

Саха өрөспүүбүлүкэтин норуотун маастара, Саха суруйааччыларын сойууһун чилиэнэ, кыраайы үөрэтээччи Николай Аржаков Чурапчы улууһуттан төрүттээх. Кини кыра эрдэҕиттэн хомустуур, айар-тутар эйгэҕэ чугас буолан, кэнники дьоҕурун сайыннаран, талаана арыллан ууһанар буолбут.

Николай Аржаков - Боло Уус, норуот маастара: «Хомус оҥорортон саҕалаабытым. Ону сэргэ кыралаан быһах оҥоробун. Урукку төрүттэрбитинэн түүрдэр буоллахпыт дии. Түүрдэр иннилэринэ кууннар, монголлар да бааллар. Олор ох саалара барыта кураахтаах, ол аата төбөтө токурдаах. Ол оннук ох сааны оҥороллор эбит. Биһиги сахалар онтукайбытын, хоту да дойдуга кэлэн баран, сайыннара сылдьыбыппыт».

Николай Николаевич ох сааны, дүҥүрү, кырыымпаны, хас биирдии үлэтин барытын үөрэтэн, чинчийэн, оҥорон таһаарар. Саха төрүт инструменнарынан оонньууругар, саҥа сүүрээннэри киллэрэр, дьону да үөрэтэр. 

Николай Аржаков - Боло Уус, норуот маастара: «Саха кыллаах үнүстүрүмүөнүн оҥорон киирэн барбытым. Арчы дьиэтин иһинэн “Күн дьоно” диэн бөлөхтөөхпүт. Арчылар устудьуоннарга семинардарга оҥор диэьиттэригэр, литератураны хасыһан үнүстүрүмүөн историятын үөрэтэн саҕалаабытым».

Айар талааннаах Николай Аржаков идэтинэн математик, олоҕун үөрэтэр, чинчийэр эйгэҕэ анаабыт. Элбэх кинигэ ааптара.

Николай Аржаков - Боло Уус, норуот маастара: «Чинчийиигэ уонна сөргүтүүгэ үлэ элбэх. Кэнники сылларга уопсайа 13 кинигэни суруйан таһаардым. Онтон биэһэ алтата кыраайы үөрэтии, төрүт култуура».

Боло Уус суруйар талааннаах уонна кыраайы үөрэтээччи буолан хас биирдии оҥорбут оҥоһуга номохторго, үһүйээннэргэ олоҕуран ааттаахтар, ис хоһоонноохтор.