Тохсунньу 1 күнүттэн дойду үрдүнэн үгүс уларыйыылар киирдилэр

Тохсунньу 1 күнүттэн хамнас алын кээмэйэ дойду үрдүнэн үрдээтэ. Ол курдук 16.6% эбилиннэ. Саха сиригэр Бюджеттан үбүлэнэр 1.7 оройоун коэффициеннаах улуустарга саамай аччаабыта 56100 солкуобайы ыйдааҕы хамнаска аахсыахтара. Оттон 2 коэффициеннаах оройуоннарга 62832 солкуобай буолла. Бу сылтан чааһынай тэрилтэлэргэ, ону сэргэ федеральнай бюджеттан хамнастанар дьоҥҥо алын кээмэй өрөспүүбүлүкэҕэ 29187 солкуобайтан кыра буолуо суохтаах.

Маны сэргэ биһиги өрөспүүбүлүкэбитигэр бу тохсунньуттан бюджет эйгэтигэр үлэлиир эрээри, категориялара ыйыллыбат үлэһиттэр хамнастара 5.37% үрдээтэ. Маныаха анаан олохтоох бүдьүөттэн 19 млрд кэриҥэ көрүлүннэ.

Сыл саҥатыттан ыйга тиийинэн олоруу алын кээмэйэ үрдээтэ. Ол курдук эрдэ 23 тыһ эбит буоллаҕына билигин 26 777 солбуобай буолла. Бу үрдээһин  оҕоҕо бэриллэр биир кэлим көмө ыйдааҕы кээмэйигэр дьайар. Онон кыра дохуоттаах дьиэ кэргэттэр бу ыйтан үрдээбитинэн аахсыахтара.

Дойдуга 2025 сылга үлэлиир пенсиялаахтар төлөбүрдэригэр индексациялпаһыны төнүннэрдилэр. 2016 сылтан тохтуу сылдьыбыт үрдэтиини сөргүттүлэр. Мантан ыла пенсиялаахтар үлэлиириттэн тутулуга суох тэҥҥэ индексацияланар буолуоҕа.

Саҥа сылга суол быраабылатын кэһии ыстарааба биллэ үрдүө. Ол курдук буруйдаахтар ортотунан балтараа төгүл элбэҕи быйылгыттан төлүүр буолуохтара.

Оттон суоппар бырааба 2025 сылга болдьоҕо тахсыбыттарга өссө 3 сыл уһатан биэриэхтэрэ. Онон быйыл 10 сыллара туолбут суоппардар өссө да 3 сыл холкутук айанныахтарын сөп.

Тохсунньуттан нолуок кодексыгар туризм нолуога диэн 33.1 диэн бас күүһүгэр киирдэ. Манна ыйылларынан хайа баҕар нэһилинньэлээх пуун бэйэтин сиригэр-уотугар баар гостиницаларга, санаторийдарга эбии туризм нолуога диэни олохтуур бырааптанна. Маннык түһээни номнуо дойду бөдөҥ куораттара киллэрэн тураллар.

Быйылгыттан арахсыы иһин төлөбүр биллэ ыараата. Эрдэ 650 солбуобай буоллаҕына 5000-тии тыһыынчаны төлүүр буоллулар.

Маны сэргэ бу тохсунньуттан баанньык, сарай, теплица курдук хапытаалынай тутууларга нолуок сокуона күүһүгэр киирдэ. Сыл саҕаланыытыгар киирбит уларыйыылартан сүрүннэрин быһа тардан кэпсээтэххэ итинник.