Бүтүн Россиятааҕы "Сыл бастыҥ учуутала" күрэх Саха сиринээҕи түһүмэҕэ саҕаланна

Амма улууһун Болугур нэһилиэгиттэн сылдьар Ганира Нестерова "Сыл бастыҥ учуутала” күрэххэ аан бастакытын кыттар. Кини биология уонна химия учуутала, бу күрэххэ сыл саҕаланыаҕыттан бэлэмнэнэн саҕалаабыт. Эдэр учуутал бастакы түһүмэххэ, аһаҕас уруогар, оҕолорго үүнээйи оҥоһуутун кэпсээтэ уонна Амма тааһыгар үүнээйилэри уруһайдатан үгүс оҕо болҕомтотун тарта.

Ганира Нестерова, Болугур нэһилиэгин орто оскуолатын биология уонна химия учуутала: "Оҕолор бары үчүгэйдик үлэлээтилэр. Сүрдээх көхтөөх эбиттэр. Ыйытыылара да хоруйдара да элбэх. Мин уруок кэннэ оҕо илиитинэн тугу эмэ дьарыгырарын ситиһэ сатыыбын".

Быйылгы күрэххэ өрөспүүбүлүкэ араас улууһуттан 35 бастыҥ учуутал кыттар. Бу күннэр устата учууталлар бэйэлэрин билиилэрин, сатабылларын көрдөрүөхтэрэ.

Мария Данилова, үөрэҕэриини сайыннарар уонна идэ таһымын үрдэтэр институт салаатын салайааччыта: "Быйыл биһиэхэ олох саҥа “Педагогическай интервью” диэн баар буолла. Инньэ гынан кыттааччылар бэлэмнэнэллэригэр да, экспертэр туох эрэ саҥаны көрүөхпүт".

Уус Майа улууһуттан кыттар Семен Иванов физкультура учууталынан үлэлээбитэ уонтан тахса сыл буолла. Кини хас биирдии уруогар сахалыы көрүҥнэри, ньыымалары киллэрэн үөрэтэр.

Уруок бүтүүтэ учуутал оҕолору барыларын түмэн оһуохайдатар, бу кини оҕолору түмэр биир көрүҥэ.  

Семён Иванов, Уус Майа улууһун Петропавловскай орто оскуолатын учуутала: "Уруоктарбар сахалыы тыыны киллэрэргэ кыһаллабын. Хамсаныылаах төрүт оонньуулар бааллар уонна уруок бүтүүтэ оһуокайдатабын. Саха туттар малын кытта билиһиннэрэбин".

Маннык сахалыы ньыыманан ыытыллыбыт уруогу оҕолор олус диэн сэргээтилэр.

Сылын аайы кыттааччы элбээн иһэр, ордук эдэр учууталлар көхтөөхтүк кытталларын тэрийээччилэр бэлиэтииллэр. Бу күрэх эрэ буолбакка, уопут атастаһыы, саҥа дьону кытта билсии буолар.

“Бастыҥ учууталы быһаарар күрэххэ 34 улуустан 35 учуутал кыттар. Бу күннэргэ хас да түһүмэҕинэн күрэстэһиэхтэрэ. Итиэннэ ахсынньы 13 күнүгэр кыайыылааҕы быһаарыахтара”