Тымныйан ыалдьыыттан нэһилиэнньэни харыстыыр үлэлэр бараллар

Хас сылын ахсын дьыл кэмэ уларыйарыгар бүтүн өрөспүүбүлүкэ үрдүнэн дьаҥнааһын ыарыыта өрө турар. Маныаха балаҕан ыйыттан саҕалаан грипп утары үлэлэр ыытыллаллар. Ол курдук Прасковья Ефимова хайаан даҕаны 3 сылга биирдэ быһыы кэлэн туруортарар. Доруобуйатын куруук көрө-истэ сылдьар.

Прасковья Ефимова, Дьокуускай олохтооҕо: «Хас биирдии киһи доруобуйата араас буоллаҕа. Ону бэйэтэ көрөн истэн наада буоллаҕына ылыан сөп дии саныыбын. Саастаах дьиэҕэ олорор дьоннор эмиэ друобуйаларыгар кыһаллыахтаахтар».

Грипп ыарыытын чэпчэкитик аһарынарга, итиэннэ ыарыыны тарҕатааччы ахсаанын аҕыйатарга грииби утары быһыыны ылыахха наадататын быраастар тоһоҕолоон этэллэр. Быйыл былаан быһыытынан өрөспүүбүлүкэ үрдүнэн нэһилиэнньэ 60 быраһыана хайаан да хабыллыахтаах, оччоҕуна эрэ нэһилиэнньэ иммунитета бар буолар. Билиҥҥи туругунан Дьокуускай куорат бары балыыһаларыгар Совигрипп, Флю М уонна Ультрикс квадри вакцианалары хас күнүн ахсын биэрэ олороллор.

Фатина Федотова, Дьокуускай куораттааҕы медициинэ киинин поликлиникатын эпидемиолог бырааһа: «Грипп сэтинньиттэн кулун тутарга дылы буолар. Ол иһин билигин бэлэмнэнэргэ саамай табыгас кэмнэр. Быһыы кэннэ имунитеппыт икки нэдиэлэнэн баар буолар».

Быһыыны бастакы уочарат оҕолор, устудьуоннар, үөрэҕирии, доруобуйа харыстабылын, социальнай тэрилтэлэр, итиэннэ олох-дьаһах коммунальнай эйгэ үлэһиттэрэ, 60-нарын аһарбыт дьон, хат дьахталлар ылаллара тоҕоостоох. Биллэрин курдук, ыарыыны сэрэппит ордук, онон харыстаныы миэрэлэрин тутуһарга, быһыыны ыларга сүбэлиллэр. 

Саргылаана Волкова, Дьокуускайдааҕы 1№-дээх поликлиника бырааһа: «Грипп утары быһыыны нэһилиэнньэ олорор сирдэринэн суруллубут поликлиникаларыгар ылыахтарын сөп. Оҕолор алта ыйдарыттан саҕалаан ылаллара ордук, ону тэҥэ привикалыыр биригээдэлэр үөрэх тэрилтэлэригэр тахсан үлэлииллэр».

Грипп быһыыта ОРВИттан уонна ковидтан харыстыыр диэн сыыһа өйдөбүл баар, хас биирдии ыарыы туспа харыстанар, эмтэнэр ньымалардаах. Оттон гриптаабыт киһи короновирустаатаҕына доруобуйатыгар хас да бүк охсуулаах буолар. Онон бэйэҕит уонна чугас дьоҥҥут доруобуйаларын харыстааҥ, грипп уонна короновирус утары быһыылары ылыҥ диэн быраастар тоһоҕолоон этэллэр.

Фатина Федотова, Дьокуускай куораттааҕы медициинэ киинин поликлиникатын эпидемиолог бырааһа: «Быһыы Грипптан эрэ харыстыыр, ОРВИттан прививка суох, Ковидтан туспа прививкалаахпыт “Спутник Лайт” баар».

Билигин Саха сиригэр ковидынан ыалдьыы ахсаана элбээтэ. Биир нэдиэлэ иһигэр 91 киһи сыстыбыта бэлиэтэннэ, күн ахсын ортотунан 10-15 киһи ыалдьар. Доруобуйа харыстабылын министиэристибэтэ этэринэн өрөспүүбүлүкэ үрдүнэн сүрүннээн COVID-19 омикрон “Пирола” көрүҥэ баһыйар. Быраастар этэллэринэн ыарыы биллэрэ боростуой ковиттан туох да уратыта суох. Ол курдук киһи кыраадыһа үрдүүр, сөтөллөр, тумуулуур, төбөтө ыалдьар уонна былчыҥнара ыалдьыан сөп.

Алексей Решетников: «Дьыл уларыйар кэмигэр дьаҥ көрдөрүүтүн таһыма куруук үрдүүр. Онон хас биирдии киһи доруобуйатын көрүнэрэ булгуччулаах. СӨ Роспотребнадзора иһитиннэрэринэн, балаҕан ыйын саҕатыттан уопсайа 3 тыһ. киһи кэриҥэ араас вирус инпиэксийэлээх ыарыынан ыарыйда».