Дьокуускайга дьиэлэртэн хаар түһэриитин үлэтэ саҕаланна

Куорат үрдүнэн хаары утары охсуһуу бу ый саҥатыттан күөстүү оргуйар. Быйылгы былаанынан куорат хаһаайыстыбатын үлэһиттэрэ кулун тутар 15-20 күннэригэр диэри уопсайа 20 тыһ. м³ иэннээх хаары тиэйиэхтээхтэр, онтон 2 тыһ. тахсата номнуо тиэлиннэ.

Валентин Эверстов, Дьокуускайдааҕы Октябрьскай уокурук салайааччыта: «Дьаһал баттаммыта онон бу ый саҥатыттан үлэбит саҕаламмыта. Управляющай компаниялар күүскэ үлэлээн эрэллэр, хаар быраҕан, таһааран эрэллэр».

Күн бүгүн сүрүн болҕомто дьиэлэр үрдүлэринээҕи хаары түһэриигэ. Киһи, анал тиэхиникэ сатаан сылдьыбат, тиийбэт сирдэригэр идэлээх альпинистар үлэҕэ кыттыһаллар. Холобур бу Рихард Зорге аатынан 5/6 нүөмэрдээх дьиэ сарайыгар анал биригээдэ үлэлиир.

Уопуттаах биригэдэ үлэһиттэрэ ыарахан усулуобуйалартан чаҕыйбакка, бу курдук 600 м² иэннээх сарайы биир күн иһигэр бүтүнньүү ыраастаан бүтэрэллэр.

Николай Саморцев 24 саастаах эдэр идэтийбит промышленнай альпинист, анал үөрэҕи бүтэрэн үлэлээбитэ алтыс сыла. Таайа идэ эйгэтигэр сыһыарыаҕыттан ыла сүрэҕинэн сөбүлээн күн бүгүнүгэр дылы дьарыгырар. Билигин номнуо бэйэтэ урбаанньыт быһыытынан бэлиэтэнэн, 4 киһилээх биригээдэ тэринэн үлэлиир.

Николай Саморцев, промышленнай альпинист: «Биллэн туран билигин өссө тымныы, ол да буоллар биһиги хаар түһэрэммит олохтоохторго уонна массыыналарга куттала суох эйгэ оҥоробут».

Альпинист идэлээх киһи сэрэхтээх туттууну-хаптыыны тутуспакка кыра даҕаны дьалаҕай хамсаныыны оҥорор түгэнигэр олоҕун толук уурар кутталлаах. Ол иһин 2020 сылга олоххо киирбит үөһээҥҥи үлэлэр сэрэхтээхтик ааһалларын ирдиир быраабылалары хайаан даҕаны тутуһаллар.

Николай Саморцев, промышленнай альпинист: «Булгуччулаах тэрилбит страховочнай быа буолар. Үөһээ үлэлиир буоллаххына 2 быалаах сылдьыахтааххын - биир сүрүн, иккис страховачнай. Эбэһээт каска баар буолуохтаах».

Үлэһиттэр үөһээ эрэ буолбакка аллара эмиэ бааллар. Холобур эбийиэк аннынан дьон-сэргэ, массыыналар ааһар түгэннэригэр араассыйа нөҥүө эбэтэр свисток көмөтүнэн сиргэ кэтиир үлэһит хамаанда биэрэн үлэ хамсааһынын тохтотор.

Промышленнай альпинистар сыл устата куруук үлэ үгэнигэр сылдьаллар. Сааскы үлэ саҥа саҕаланан, туруору сарайдаах эбийиэктэрэ билигин да элбэх.