Таатта улууһугар физкультура учууталларын күрэҕэ ааста

Кыракый хамсаныыттан, эти-хааны уһугуннарыыттан улахан күрэххэ кыайыы көтөллөнүү - бу барыта физкультуура учууталын сырата. Кыракый саалаттан, оскуолаттан бастакы хардыы саҕаланар. Онтон Таатта оскуолаларыгар улууска спорт сайдыытын өрө туппут, сайыннарбыт, Сергей Гаврильевич Огонеров үөрэнээччилэрэ үгүстэр. Кинилэр бары Тыараһа оскуолатыгар мустан, учууталларын ахталларын-саныылларын таһынан, бэйэ икки ардыгар күрэхтэстилэр.

Василий Новгородов, С.Г.Огонеров үөрэнээччитэ, Даайа-Амма орто оскуолатыгар физкультуура учуутала: «Оччолорго секцияны барытын, тустуу буоллун, гиирэ буоллун барытын, саахыматы, дуобаты барытын физрук оҥорор этэ. Онно курэхтэлиирэгэ кытыннарар, кэлэр-барар. Бортобуой массыынаҕа мат тэлгээн баран, кэлэр барар этибит».

Оскуолаҕа кэлбит ыалдьыттарга стенд турбута мээнэҕэ буолбатах. Манна Сергей Гаврильевич оскуолаҕа үлэлиир кэмнэригэр бэйэтэ барыллаан оҥотторбут, оскуолаҕа оҕолору эрчийэр тэриллэрэ турдулар. Оччотооҕу кэмҥэ физкультуура учуутала барыны бары сатыыр буолуохтааҕа. Ол урдук эппиэтинэһи Сергей Гаврильевич толору сүкпүтэ. Кырдьар сааһыгар учууталлар учууталлара диэн үрдүк аатынан бэлиэтэммитэ.

Пётр Полускин, Тыараһа орто сокуолатын дириэктэрэ: «Кини бэйэтэ толкуйдаабыт инвентаара өр сылларга бу оскуола олбуоругар турбута. Ол курдук оҕо хатаастарга эрчийэр тимир инвентарь оҥорбута улахан».

Күөн көрсөн сатабылы тургутар күрэхтэһиигэ барыта улуустан 8 физкультура учуутала кэллэ. Кинилэр 4 түһүмэҕинэн дьүллүүр сүбэ иннигэр турдулар. Манна уруок, уруок кэннэ дьарык, бэйэ оҥорбут инвентарь, спортивнай түһүмэх диэн ааттарынан күрэхтэстилэр. Онтон саамай тыҥааһыннаахтара хас да көрүҥтэн турар спортивнай курэх буолла.

Төһө да өрө күүрүүлээх күрэхтэһии буолбутун иһин, түөрт түһүмэххэ үһүгэр, кыттааччылартан саамай саастаахтара, Сергей Гаврильевич уола Гаврил Сергеевич Тыараһа орто оскуолатын физкультураҕа учуутала ыраас кыайыыны ылары ситистэ.

Гаврил Огонеров, Күрэх кыайыылааҕа: «Аныгы учуутал сайда турар үйэҕэ туох биир тиэхиникэни, ньымалары туттан оҕолору үчүгэйдик иитиэхтээх уонна үөрэтиэхтээх».

Иккис миэстэ Ытык-күөл 1-кы нуемэрдээх оскуолатыттан Максим Большаков, үһүс Уолбаттан Артаньян Неустров буоллулар. Уоннааҕы кытааччылар анал ааттарга тигистилэр. Түмүккэ, тэрийээччилэр, быһыйдары, күүстээхтэри эрчийтэлээн таһаарыҥ, Саха саргытын салайсыҥ диэн алҕаатылар. Сергей Гаврильвеич Огонеров кэриэһигэр анаммыт улуустааҕы физкультура учууталларын курэҕэ урдук таһымҥа ааста.