Ил Дархан Харытыгар бастыҥ үөрэнээччилэри чиэстээтилэр
Главное
-
8 сентября в 02:458 сентября. День в истории - даты, события
-
8 сентября в 00:30Прогноз погоды в Якутии на 8 сентября
-
7 сентября в 11:48В Якутске обсудили улучшение городской среды и качества жизни людей на форуме "Якутск 4.0.0"
-
7 сентября в 11:16Айсен Николаев встретился с командиром добровольческого батальона "Боотур"
Горнай улууһуттан сылдьар Арсен Михайлов бастыҥ көрдөрүүлэрин иһин истипиэндьийэ хаһаайына буолла. Дуобакка Араассыыйа спордун маастарын толорон, бу сыллааҕы ситиһиитэ муҥура суох. Маны таһынан аан дойду таһымнаах өй оонньууларыгар, олимпиадаларга кыттан бэйэтин дойдутугар элбэх ситиһиини аҕалла. Туйгун үөрэнээччи инники былаанын туһунан кэпсээтэ.
Арсен Михайлов, Ил Дархан истипиэндьийэтин хаһаайына: "Биир кэлим эскээмэммэр математиканы, физиканы уонна информатиканы таллым. Физико-техническэй хайысхалаах үөрэхтэри көрө сылдьабын. Ил Дархан харыйатыгар бараҕын диэбиттэригэр олус диэн үөрбүтүм. Онтон уон иһигэр киирбиппин истэн туох диирбин да билбэт гына соһуйбутум, үөрбүтүм".
Үгэс быһыытынан цииркэ кэлэктиибэ Саҥа дьыллааҕы көрдөрүүнү оҕолорго бэлэхтээхэ. "Туундара күнэ" туруоруу Саха сирин аҕыйах ахсаннаах норуоттарыгар ананна. Хайа да тымныы Саха сирин оҕотун мындыр толкуйун тоһуппат, үтүө сүрэҕин тоҥорбот диэн ис хоһоонноох. Оҕолор циркэ маастардара чаҕылхай туруорууларын көрөн, сүргэлэрэ көтөҕүлүннэ.
Хас биирдии үөрэнээччигэ маннык түгэн олоҕор биирдэ күлүм гынан ылар. Онон өрөспүүбүлүкэ бастыҥнарын иһигэр ааттанан кэлбит оҕолор биир да мүнүүтэни мүлчү туппакка туох баар тэрээһиннэргэ барытыгар актыыбынайдык кытыннылар. Сунтаар улууһуттан 32 киһилээх дэлэгээссийэ 2 күн айаннаан кэллэ. Ил Дархан харыйатыгар сылдьар туһугар, уһун айаны төһө баҕарар тулуйуох курдукпун диэн ЛюбомирТрофянов үллэстэр.
Любомир Трофянов, Кутана орто оскуолатын 11-с кылааһын үөрэнээччитэ: "Оскуолабыттан миигин талбыттарыгар олус үөрдүм. Үөрэхпэр тугуммун, оскуолаҕа олоҕор көхтөөхпүн,элбэх ситиһиилэрдээхпин ол иһин миигин манна ыыттылар".
Бастыҥтан бастыҥ спортсменнары, олимпиада кыайыылаахтарын үрдүк сыанаҕа таһааран чиэстээтилэр. Элбэх оҕоҕо холобур буолар үөрэнээччилэргэ Айсен Николаев туоһу сурук туттарда. Инникитин дойду аатын киэн тутта ааттатар саҥа ааттар тахсыахтара диэн бигэ эрэлин уурарын иһитиннэрдэ. Кэлэр сыл Саха сиригэр Оҕо саас сылынан биллэрилиннэ, онон оҕо кииннэрэ сайдарыгар элбэх былаан олоххо киириэҕэ.
Афанасий Ноев, СӨ култуура уонна духуобунай сайдыы миниистирэ: "Ил Дархан кэлэр сылы оҕо саас сылынан биллэрдэ онон бу ураты Харыйа буолар дии саныыбын. Оҕолорбутун үөрэтэ, такайа сылдьар учууталларбытыгар уонна кинилэр төрөппүттэригэр махтанабыт. Өрүүтүн дьоллоох оҕо саас баар буоллун".
Бүтүн Арассыыйатааҕы оскуола оҕолорун олимпиадатыгар кыайбыттарга 500 тыыһынча, оттон миэстэлэспиттэргэ 300 тыыһынча солкуобай туттарыллар буолла. Бу бириэмийэ номнуо олоххо киирэн, бастыҥ оҕолорго ананна. Онон, оҕо билимин сайыннарыыга улахан болҕомто ууруллан, кэлэр сыл элбэх ситиһии кэлэрэ күүтүллэр.