Киһи эчэйиилээх суол быһылаанын ахсаана элбиир

Хас күн ахсын сыллата өрөспүүбүлүкэ бары улуустарыгар, федеральнай уонна өрөспүүбүлүкэ таһымнаах суолларга тимир көлөлөр харсыһыылара, араас таһымнаах суол быһылааннара буолаллар. Ол курдук, сыл саҥатыттан бүтүн өрөспүүбүлүкэ үрдүнэн 785 суол быһылаана таҕыста, 67 киһи суорума суолланна, 1000-тан тахса киһи араас таһымнаах эчэйиилэри ылла.

Күннэй Иванова, СӨ ИДьМ суолга-иискэ куттал суох буолуутун хааччыйар салаа аҕа иниспиэктэрэ: “Суоппардар, ыраах айаҥҥа турунуоххут иннинэ тэхиникэҕитин көрүнэн баран айаннааҥ, ичигэс таҥас, хаатыҥка илдьэ сылдьыҥ, тохтоон турар кэмҥитигэр анал бэлиэҕитин туруораргытын умнумаҥ, уот тэйитэр таҥас кэтэргит  сүбэлиибит”.

Бэйэ-бэйэҕэ сэрэхтээх буолуу суол бары кыттыылаахтарыттан ирдэнэр. Билиҥҥи кыһыҥҥы тымныы, туманнаах бириэмэҕэ болҕомтолоох буолуу хас биирдии киһиттэн эрэйиллэр. Ону суоппардар эмиэ бэлиэтииллэр.

Суолга сэрэҕэ, болҕомтото суохтан эрэ буолбакка итирик туруктаах дьонтон сылтаан эмиэ сыллата аҕыйаҕа суох быһылаан тахсар. Ол курдук бу сыл устата итирик туруктаах суоппардартан сылтаан 90 суол саахала таҕыста. Хомойуох иһинө 20 киһи суорума суолланна, 124 киһи эчэйии ылан балыыһаҕа көрдөрүннэ.

Семен Алексеев, суоппар: “Тумаҥҥа сэрэнэ сылдьыахха наада. Суоппардар кэлин уоттара тыгара буоллар диэн баҕа санаа баар”. 

Горнай улууһун Одунутугар "Бүлүү" федеральнай суолугар суол быһылаана элбэҕиттэн сылтаан, нэһилиэк дьаһалтата быыһыыр этэрээт тэриннэ. Манна дьон бэйэлэрин баҕаларынан үлэлиллэр. Бэйэлэрин баҕаларынан бастакы көмөнү оҥорорго үөрэннилэр, баһаарынай сулууспаны кытары тэҥҥэ үлэлэһэн саахалламмыт массыынаттан дьону быыһырыгра туһуламмыт үөрүйэхтэри ылыннылар.

Василий Кривошапкин, Горнай улууһун Одуну нэһилиэгин баһылыгын солбуйааччы: «Этэрээппитигэр 18 Одуну нэһилиэгин эр дьоно бааллар. Биһиги нэһилиэкпит федеральнай трассанан ааһар буолан, алдьанан тохтооччу элбэх. Онон биһиги сыалбыт-сорукпут бу дьоҥҥо көмөлөһүү».

ГИБДД инспектордара сыллата буоларын курдук суолга сэрэхтээх буоларга ыҥыраллар. Кыһыҥҥы хараҥа, туманнаах кэмҥэ суоппардартан болҕомтолоох буолаллара ирдэнэр.