Байыастарга көмөнү оҥоруу тиһигин быспат

Бу курдук волонтедар анал байыаннай дьайыы кыттыылаахтарыгар кэлбит гуманитарнай көмөнү наардаан, ыйааһыннаан, суруйан бэлэмнииллэр. Ыстаапка кэлбит хас биирдии мал байыастарга хайаан да тиийэр.

Анна Ефимова, "Якутия с тобой" хамсааһын бэрэссэдээтэлэ: "Ааспыт нэдиэлэҕэ 1,3 туонна курдук гуманитарнай көмө ыыттыбыт. Көмөбүт аара баран иһэн сороҕо Улан-Үдэҕэ баар госпиталга номнуо тиийдэ".

Волонтердар ыстааптарыгар үлэ күөстүү оргуйар. Манна сүрүннээн ийэлэр, эбээлэр кэлэн көмөлөһөллөр. Маны таһынан тэрилтэлэр, түмсүүлэр эмиэ туора турбакка нэдиэлэҕэ хаста да  кэлэн күүс-көмө буолаллар. Холобур, бу улуустар байыастарга анаан кытыан хомуйан ыыппыттар.

Анастасия Алексеева, Дьокуускай куорат олохтооҕо: "Горнайтан уонна Ньурбаттан ыыталлар. Хатаран баран кыра гына кырбастанар. Байыастар манан бэйлэрин ыраастанан, алгыстанан күүс-көмө ылаллар".

Дарья Яковлева ыстаапка кэлэн көмөлөспүтэ үһүс сылыгар барда. Кини билигин байыастарга анаан күһүҥҥү таҥас тигэ сылдьар. Күҥҥэ биир иистэнньэҥ иккилии көстүүм тигэр.

Дарья Яковлева, волонтёр: "Субуотаҕа кытта үлэлиибит, өрөбүлгэ эрэ сынньанабыт. Билигин матырыйаалбыт бүтэн хаалла, онон икки күн сынньанабыт. Байыастарга барыта үчүгэй буоларын туһугар көмөлөһөбүт".

Аныгыскы гуманитарнай көмө балаҕан ыйын 10-с күннэригэр барыаҕа. Онон ким баҕалаах "Якутия с тобой" волонтердар ыстааптарыгар наадалаах мал-сал, ас, эмп, аҕалан туттарыан сөп.