Саха сиригэр сыл саҕаланыаҕыттан үлэтэ суох дьон ахсаана 3300 киһиннэн аччаата

Нэһилиэнньэ дьарыктаах буолуутун киинигэр дьон күннэтэ тохтобула суох кэлэр. Үлэ көрдөнөөччү ахсаана аҕыйаҕа суох. Дьон сүрүннээн оробуочай үлэни туоһулаһар. Аҥардас сыл саҕаланыаҕыттан 16 тыһыынча кэриҥэ киһи кэлэн үлэ көрдөнөрүн туһунан иһитиннэрбит. Итинтэн аҥара номнуо үлэ миэстэтин булбут. Онтон 5 тыһыынча киһи постояннай үлэҕэ онтон ордуга быстах үлэҕэ киирбиттэр.

Анастасия Позднякова, СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин бастакы солбуйааччы: «Статистика көрдөрөрүнэн тохсунньу-алтынньы ыйдар түмүктэринэн үлэтэ суох дьоннор ахсааннара уонна уопсай таһыма 5,6% буолан турар. Сайыҥҥы кэмҥэ ити көрдөрүү 5,4% дылы кыччыы сылдьыбыта. Уопсайа Саха сиригэр 28 тыһ. тахса үлэтэ суох киһи баар».

Идэтэ суох эбэтэр идэлэринэн үлэ булбакка сылдьар дьоҥҥо "Демография" национальнай бырайыак чэрчитинэн саҥа идэни, быстах кууруустары ааһарга быйылгы сылга федеральнай бүддьүөттэн 1350 киһини үөрэтэр сорук турара. Онтон 1300 киһи саҥа идэни баһылаата, хаалбыт 50 дьон сыл бүтүөр диэри үөрэхтэрин түмүктээн бу ылыллыбыт былаан туолуохтаах. Үлэ көрдөнөөччү үксүтэ Дьокуускай куоракка баар.

Мария Слепцова, "Мин үлэм" офис куораттааҕы салалталарын салайааччыта: «Работа в России диэн портал нөҥүө эмиэ кинилэргэ биир тэҥ цифровая платформа баар. Үлэтэ суохтарга направление биэрэбит онтон. Билигин уопсайа куоракка 2488 аһаҕас үлэ миэстэтэ баар. Холобур рабочай идэлэри көрөр буоллахха – суоппардарга, дворник, уборщик, асчыт үлэлэрэ бааллар. Онтон сулууспалаахтары көрдөххө – араас инженердар, менеджердар, инспектордар, специалистар, быраастар уонна медсестралар игин бааллар».

Бүтэһик сылларга нэһилиэнньэ дьарыктаах буоларыгар, үлэтэ суох дьон аччыырыгар туһуламмыт анал бырагырааммалар, бырайыактар үлэлээннэр үлэтэ суох дьон бүтүн өрөспүүбүлүкэ үрдүнэн 3 300 киһиннэн аччаата.

Нэһилиэнньэ дьарыктаах буолуутун судаарыстыбаннай кэмитиэтэ иһитиннэрбитинэн "Олохтоох каадырдары промышленноска" бырайыак чэрчитинэн Ил Дархан уурааҕынан быйылгы сылга 10 тыһыынча киһиэхэ үлэ миэстэтин биэриэхтээх этилэр. 9 ый түмүгүнэн 8,5 тыһыынча киһи промышленность эйгэтигэр үлэ булуммут. Өссө да үлэ салҕанар.

Анастасия Позднякова, СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин бастакы солбуйааччы: «Ол иһигэр эдэр ыччаттар 5 тыһ. тахса киһи уонна 2 тыһ. тахса тыа сириттэн сылдьар олохтоохтор промышленноска киирэн үлэлээтилэр. Бырайыакпыт “Олохтоох каадырдары промышленноска” диэн эрээри транспортнай тэрилтэлэргэ, суол хаһаайыстыбатыгар, энергетикаҕа уонна тутуу эйгэтигэр киллэрэргэ үлэлии сылдьабыт».

Ааспыт сыллары кытары тэҥнээн көрдөххө үлэтэ суох дьон ахсаана аччыыр, ол эрэн үлэ миэстэтин көрдөнөөччү элбиир.  Күн бүгүн тустаах тэрилтэ иһитиннэрэринэн  28 тыһыынча киһи үлэтэ суох ахсааныгар киирэр.