Горнай улууһугар кыыллары иитэр дьоҕус пиэрмэ саҥа эбийиэгин арыйда

2021 сыллаахха Бэрдьигэстээххэ оччолорго улуустааҕы гимназия 9 кылааһын үөрэнээччитэ Яна Данилова  төрөппүттэрин кытары кыыллары көтөрдөрү тутар дьоҕус пиэрмэни  тиэргэннэрин  иһигэр тэрийбиттэрэ. Бэйэ кыаҕынан арыллыбыт пиэрмэ “МиниЗоо” диэн сүрэхтэнэн  оҕолор сайыҥҥы сынньалаҥнарын, өрөбүллэрин атааралларыгар нэһилиэккэ биир тутаах миэстэнэн буолбута.

Яна Данилова "МиниЗоо" дьоҕус пиэрмэ тэрийээччитэ: «2021 сылга саас бизнес стартап куонкуруска кыттыбытым, Василий Петрович бириистэригэр, онно 3 миэстэ буолбутум. Онтон буоллаҕына сайын 2021 сылга оҕо күнүгэр арыллыбыппыт. Онно кыракый этибит. Дьиэбит иэнин аҥарынгар этибит. 3 ый үлэлээбиппит сайыҥҥы кэмҥэ, онтон 2022 сылга онньуур миэстэ арыммыппыт, кэҥээбиппит кыратык».

Яна пиэрмэтин салгыы үүннэрэр, сайыннарар, кэҥэтэр  сыаллаах  араас куонкурустарга кыттыыны ылла, холобур  2022 сыллаахх Саха өреспүүбүлүкэтин 25 саастарыгар диэри ыччаттарга анаммыт куонкуруһугар ситиһиилэнэн 375 тыһ. солк үбү ылары ситиспит, ону таһынан бу ааһан эрэр сыл дьиэ кэргэн тэриммит бизнеһигэр эмиэ үгүс ситиһиилэри бэлэхтээтэ. Ол курдук улуус дьаһалтатын гранын 1 мөл. солкуобайа   сылы эргиччи үлэлиир эбийиэги тутууга тирэх буолла. Тутууну ыал аҕа баһылыга Алексей Иванович бэйэтэ иилээбит.

Яна Данилова "МиниЗоо" дьоҕус пиэрмэ тэрийээччитэ: «Улуус граныгар кыттамын олус улахан көмө буолла биһиэхэ. Элбэх матырыйаал ыллыбыт, киэргэл, оборудования, кыылларга саҥа клетка атыыластыбыт».

Пиэрмэ кыыллара көтөрдөрө саҥа киэҥ-куоҥ сылаас дьиэлэнэн, хаһаайыттарыттан итэҕэһэ суох үөрбүттэр, соҕуруу дойду көтөрө павлин сотору сотору кутуругун өрө туруоран бу мин баарбын диэбиттии оргууй хаамар,  күн-бүгүн  көтөр кынаттаах, сүүрэр атахатаах улиткатыттан, чарапаахатыттан, ежигыттан саҕалаан куһугар, сибиинньэтигэр тиийэ  уопсай ахсааннара 16 керуҥ. Ол иһигэр павлиннар үстэр иккитэ атыыр биирэ тыһы.

Пиэрмэ элбэх кыылын сүөлун көрүү биллэн турар үгүс сыраны  сылбаны эрэйэр маныаха Яна төрөппүттэрэ  Мариялаах, Алексей кыыстара устудьуоннуур кэмигэр бэйэлэрин илиилэригэр ылбыттар. Пиэрмэ көтөрдөрө хаастар, кууруссалар кэлбит дьон харахтарын саататалларын таһынан, дьиэ кэргэни  сибиэһэй сымыытынан кыһыннары хааччыйаллар.  Яна кыра уһуйаан сааһыттан дьиэ кыылларын көтөрдөрүн  көрөрүн  сөбүлүүр ол баҕа санаата туолла диэн ийэтэ санаатын үөрэ үллэстэр

Мария Данилова, Яна ийэтэ: «5 саастааҕар оҥорбут докладка бэлэмнэммит бырайыага. Биһи дьиэ кэргэн 1998 сыллаахха хаһаайыстыбабытын тутан саҕалаабыппыт. Аан маҥнайгы козабыт 2005 сыллаахха кэлбитэ. Онтон сөбүлүүр кыылларбытын бэйэбит өрөспүүбүлүкэ араас улуустартан, арааһынай бөлөхтөрү кытта билсэбит. Куролуктары, көтөрдөрү иитэр хаһаайыстыбалары кытта атастаһыы уонна атыылаһыы бэрээдэгинэн ылан олоробут».

Эмиэ бу сылга Яна өрөспүүбүлүкэ граныгар бэйэтэ суруйбут бырайыагынан кыттан, 680 тыһ. солк. ылары ситиспит, бу харчынан саҥа тутуллубут эбийиэк иккис мэндиэмэнигэр оҕолор оонньууларыгар лабиринт сотору кэминэн туруоҕа. Бу курдук “МиниЗоо” дьиэ кэргэн дьоҕус пиэрмэтэ Горнай улууһун туристическай маршрутун каартатыгар киирдэ.