Нефролог уонна ревматолог быраастар Черскэйгэ үлэлээтилэр
Киһи сөҕүөх эрэ дьикти аппараатын Аллараа Халыма улууһугар быраастар илдьэ кэлэн тутатына анализ түмүгүн таһаараллар. Хара сарсыардаттан саҕалаан Черскэй бөһүөлэгин "Зеленай мыс" дьоҕус оройуонугар устудьуоннар дьиэлэригэр үгүс киһи тоҕуоруһа мустубут. Манна Дьокуускай куораттан улууска суох нефролог уонна ревматолог быраастар "Арктикатааҕы десант" бырайыак чэрчитинэн биир нэдиэлэ устата үлэлээтилэр.
Хоту дойду дьоно тыйыс усулуобуйаҕа олорор буоланнар, үгүстэрэ тымныйыыны кытары ситимнээх ыарыылара көбөр. Сороҕор ыарыы олохсуйан хаалан, суһаллык эмчиккэ көрдөрүнэр, сөптөөх диагноз туруортарар наада буолар. Онуоха бүөр туругун билэргэ туһуламмыт аппараат төһүү күүс буолла.
Антонина Анисимова, "Арктика десана" бырайыак кыттыылааҕа, нефролог быраас: "Белок, микроальбумин, лейкоциты диэн ыарыылары көрдөрөр. Лейкоциты диэн бүөрүгэр таастаах киһини булан ылыахха сөп, бу аналиһынан көрөн. Уонна сахары көрөр буолан саахарнай диабеттаах киһини булан ылыахха сөп".
Хас да күннээх үлэ түмүгэр бүөр ыарыылаах дьон элбэхтэрэ, ыарыыларын билбэккэ сылдьыбыт дьон баара билиннэ. Кинилэргэ барыларыгар тустаах эмтэнии, сорохтору киин куоракка илдьэн ситэри чинчийиэх буоллулар.
Антонина Анисимова, "Арктика десана" бырайыак кыттыылааҕа, нефролог быраас: "Сүрүннээн тымныйыы ыарыыта элбэх эбит. Бэҕэһээ мин Черскэйгэ 43 аналиһы оҥордум, ол тухары холобура 10-тан тахса тымныйыылаах киһини булан, консультация оҥорон, аналлаах эмптэри анаатым".
Өссө биир сэдэх идэлээх быраас Саха өрөспүүбүлүкэтин сүрүн ревматолога Людмила Леонтьева буолар. Кини ортроз, остеопороз, уҥуох тостуутун, сүһүөх ыарыыларын көрдө. Саха сиригэр эрэ буолбакка, бүтүн аан дойду үрдүнэн сүһүөх, уҥуох ыарыыта сытыытык турар. Онон уһук хоту сытар улуус дьонугар маннык быраастар кэлиилэрэ, доруобуйаларын көрдөрүнэллэригэр, эмтэниини сөпкө уонна табыгастаахтык ыытарга улахан көмөлөөх.
Людмила Леонтьева, "Арктика десана" бырайыак кыттыылааҕа, СӨ сүрүн ревматолог бырааһа: "Арктикаҕа тыйыс услуобуйаҕа остеопороз, артрит өссө күүскэ сытыытык турар, статистикатын билбэппит, ол эрэн манна кэлбит дьону кэтээн көрдөххө оннук ыарыылаах киһи барыта курдук".
Черскэйдээҕи балыыһа үлэһиттэрэ кэлбит быраастарга көмөлөһөн, анализтары ылыыга, докумуону толорсууга үлэлээтилэр. Ылыллыбыт хаан анализтарын Дьокууускай куоракка аҕалан, лабораторияҕа туттаран түмүгүн ыыталлар. Аллараа Халымаҕа киин куораттан сылга ортотунан иккитэ кэлэн бараллар. Онтон бүөр уонна сүһүөх бырааһа бу эргин кэлбэтэхтэрэ ырааппыт.
Мария Винокурова, Черскэйдээҕи балыыһа сиэстэрэтэ: "Нефролог бырааһы кытта үлэлээтим. Бу биохимическэй хаан аналиһын ыллым. Бу анализ куоракка барар уонна төттөрү түмүгүн эмтээһини кытары ыыталлар. Маннык специалистар кэлэллэрэ наһаа үчүгэй, нефролог уонну ревматолог быраастар 5 сылга биирдэ кэлээччилэр. Киһи бөҕөтө кэллэ, анализ туттардылар".
Быраастар нэһилиэнньэ туругун көрөн тустаах эмтэниини анаатылар. Сорох дьону Дьокуускай куоракка ыҥыран, балыыһаҕа сытыаран эмтээн, туруктарын көннөрөн ыытыахтаахтар.
Людмила Леонтьева, "Арктика десана" бырайыак кыттыылааҕа, СӨ сүрүн ревматолог бырааһа: "Участковай терапевы кытары кэпсэтиэҕим, направления чыыһылатын ыарыһах хаһан балыыһаҕа киирэрдии кэлэрин этэбит. Биһиги аан бастаан ыйытабыт сөмөлүөттэрэ хаһан көтөрүн. Куоракка кэлэн баран гостиницаны киһи барыта кыайан уһулар кыаҕа суох. Ол иһин сөмөлүөт хас чааска көтөн кэлэрий диэн учуоттаан тураммыт ыарыһахтары балыыһаҕа ылабыт».
Биир нэдиэлэ устата нефролог уонна ревматолок быраастарга 100-тэн тахса киһи сырытта. Быраастар нэһилиэнньэни эрэ кытары буолбакка, балыыһа үлэһиттэригэр араас лекциялары, семинардары ыыттылар. Бүөр, сүһүөх ыарыытын эмтиир ньымалары, саҥа сүүрээннэри билиһиннэрдилэр.
