Дьокуускайга доруобуйа дьаарбаҥката тэрилиннэ

Доруобай Дьокуускай бырайыак чэрчитинэн, куорат төрөөбүт күнүн көрсө, Өксөкүлээх аатынан норуоттар доҕордоһууларын дьиэтигэр сарсыарда эрдэттэн элбэх киһи муһунна. Доруобуйа дьаарбаҥкатыгар  дьон төһө кыалларынан сылдьа сатыыр. Сүрүннээн, саастаах дьон көхтөөхтүк тоҕуоруспут. Манна туох да талона, направлениета суох ханнык баҕарар исписэлиискэ көрдөрүнэн, консультация ылыахха сөп.

"Харахпын көрдөрөөрү кэллим уонна грипп быһыытын ыллым. Онтон ФЛГ түһэ тахсыам. Олус үчүгэйдик тэрийбиттэр", - диир  Дьокуускай олохтооҕо Антонина Иванова.

Тэрээһиҥҥэ уонунан балыыһа исписэлиистэрэ кытыннылар. Ол курдук терапевт, невролог, эндокринолог, дерматолог, нарколог онтон да атын быраастар кэлбиттэр. Ону тэҥэ, тустаах оборудованияҕа кытта түһэн, араас диагностыыр чинчийиилэри, туһалаах процедураны ылыахха эмиэ сөп. Вера Серефимовна Слепцова ыраах Дьааҥы улууһун Баатаҕай нэһилиэгиттэн Дьокуускайга кэлэ сылдьар. Доруобуйа дьаарбаҥкатын туһунан социальнай ситимнэртэн истэн, тута көрдөрүнэргэ соруммут:

"Маннык сотору-сотору буолара буоллар, саха дьоно доруобуйаларын көннөрүнүөхтэрэ эбит дии саныыбын. Сорох тыаттан кэлбит дьон кыайан уочаракка хапсыбаттар. Бу курдук миэстэтигэр үрдүттэн көрдөрөр үчүгэй".

Кэлбит дьон хаан туттаран холестеринын, сахарын бэрэбиэркэлээтэ. Дабылыанньатын, ыйааһынын, уҥуоҕун уһунун эмиэ биллэ. Ону тэҥэ, ВИЧ статускун быһаартарар кыах эмиэ баар. Быраастар хас биирдии киһиэхэ сүбэлээн-амалаан направление биэрэллэр. Онкология ыарыытын эрдэттэн сэрэтии, хас биирдии киһини долгутар. Онкопоиск диэн бырайыак Саха сиригэр 2020 сыллаахтан олоххо киирэр. Сүрүн сыалынан Өрөспүүбүлүкэҕэ элбэх киһини чинчийэн, рак ыарыыны эрдэ булуу буолар. Онкологическай диспансер исписэлиистэрэ дьонтон хаан аналиһын ылан, салгыы чинчийиигэ ыыталлар.

"Хаан анаалыһын ылабыт уонна анкета толоттооробут нэһилиэнньэҕэ. Онколог уонна узи бырааһа көрөллөр. Сарсыарда 9 чаастан дьон бөҕөтө кэлэр", - диир СӨ онкологическай диспансерын сүрүн медсиэстэрэтэ Светлана Гоголева.

Саамай элбэх киһи республикатааҕы харах балыыһатын көһө сылдьар мобильнай комплексыгар муһунна. Харах ыарыыта саастаах дьон ортотугар  киэҥник бэлиэтэнэр, итиэннэ балыыһаҕа бэйэтигэр көрдөрүү элбэх бириэмэни эрэйэр буолан, хас биирдии киһи маннык түргэн, ол эрээри бэрт көдьүүстээх тэрээһиннэри сэргиир. 

Сүрэх уонна хаан баттааһынын ыарыыта, сахарнай диабет уонна рак курдук ыарахан ыарыы, эдэримсийэн иһэрэ дьиксиннэрэр. Билиҥҥи кэмҥэ сааһыттан тутулуга суох сахарнай диабетынан ыалдьыахха сөп. Маны тэҥэ, тирии ыарыыларын көрдөрүүтэ үрдүк.

"Мин анал аппарааттахпын, онон дьон этин-сиинин көрөбүн. Көлүөнэттэн көлүөнэҕэ бэриллэр ыарыылар элбэхтэр, биһиги Сахабыт сирин дьонугар. Дерматиттаахтар, псориазтаахтар, экземалаахтар үгүстэр", - диэн СӨ кожно-венерологическай диспансер дерматолог бырааһа Евгения Пинигина иһитиннэрдэ.

Дьаарбаҥка ким баҕалаахха бары өттүнэн көмөлөөх буолла. Чэгиэн турук – киһи солбуллубат баайа. Онон доруобуйаҥ бэйэн илиигэр буоларынан, ыарыыны эмтиэхэтээҕэр сэрэтэр оруннааҕын, хас биирдиибит өйдүөх тустаах.